Ամանորյա տոներն անցյալում են, իսկ հիմա օրգանիզմը կարգի բերելու իսկական ժամանակն է: NEWS.am Medicine-ի խմբագրութունը Ձեզ է ներկայացնում մի շարք օգտակար խորհուրդներ, թե ինչպես կարելի է օրգանիզմը բեռնաթափել ամանորյա տոներից հետո:
1. Վարսակ
Վարսակի շիլան ժամանակակից գիտությանը հայտնի ամենաօգտակար ճաշատեսակներից մեկն է: Եթե ուզում եք Ձեր օրգանիզմը հանգստանա տոնական ուտեստներից, նախաճաշն սկսեք վարսակով, իսկ ավելի լավ կլինի, եթե ծոմ պահեք եւ այդ օրվա ընթացքում միայն վարսակի շիլա ուտեք: Եթե սովորական վարսակը Ձեզ համեղ չի թվում, ավելացրեք ընկույզ, չամիչ, մրգեր կամ դարչին:
2. Կաթնաթթվային մթերքներ
Կաթնաթթվային մթերքները նույնպես կարող են օգնել օրգանիզմին հանգստանալ ամանորյա տոներից հետո: Եթե սովորական կեֆիրը կամ մածունը Ձեզ դուր չեն գալիս, դրանցից համեղ եւ օգտակար յոգուրտ պատրաստեք՝ ավելացնելով մանրացված ընկույզ, մրգեր կամ դարչին: Եթե շատ եք ցանկանում, որ այն քաղցր լինի, կարող եք ավելացնել նաեւ Ձեր սիրած մուրաբայից: Կեֆիրից կամ մածունից պատրաստված տնական յոգուրտը կարող է կարգավորել ստամոքսն ու մարսողությունը:
3. Բանջարեղենային աղցաններ
Տոնական սեղաններին սովորաբար աղցանները բավականին շատ են լինում, բայց տոներից հետո ցանկալի է անցնել բանջարեղեններից եւ ձիթապտղի յուղից պատրաստված ավելի թեթեւ աղցաններին: Պարզապես կտրատեք կաղամբը, կանաչին եւ գազարը, ավելացրեք մի քիչ ձիթապտղի ձեթ, եւ համեղ ու օգտակար աղցանը պատրաստ է:
4. Մսային ուտեստներ
Մսային ճաշատեսակները հետտոնական բեռնաթափման ժամանակ նույնպես թույլատրելի են, բայց տապակած մսի մասին մոռացեք. դրա փոխարեն հավ կամ ձուկ խաշեք եւ կերեք աղցանի հետ: Ճիշտ է՝ խաշած հավը երեւի թե այնքան էլ հետաքրքիր ճաշատեսակ չէ, ինչպես տապակածը կամ խորովածը, բայց այն օգտակար է եւ դիետիկ, իսկ աղցանների ու համեմունքների հետ՝ նաեւ բավականին համեղ:
5. Քաղցրավենիք
Նույնիսկ բեռնաթափման ժամանակ պետք չէ մոռանալ քաղցրավենիքի մասին, սակայն թխվածքների եւ կարկանդակների փոխարեն ավելի լավ է ընտրել անյուղ կաթնաշոռ: Կաթնաշոռի մեջ ավելացրեք կտրտած մրգեր, ընկույզ, մի քիչ վանիլին եւ դարչին: Կստացվի համեղ, բայց ամենակարեւորը՝ դիետիկ քաղցրավենիք:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր