«Դեղերի մասին» օրինագծում նոր փոփոխությունները՝ ոլորտի ներկայացուցիչների դժգոհության պատճառ

«Դեղերի մասին» օրենքում փոփոխությունները դժգոհություն են առաջացրել Հայաստանի դեղարտադրողների շրջանում, որոնք հանդես են եկել հանդիպակած առաջարկություններով եւ այժմ սպասում են առողջապահության նախարարության արձագանքին: Բանն այն է, որ ներկայումս գործող դեղերի գրանցման կարգի համաձայն՝ տեղական արտադրողները գրանցման համար վճարած գումարի մի մասը ետ են ստանում՝ պետական սուբսիդիայի տեսքով, իսկ այժմ առաջարկվում է վերացնել այս արտոնությունը: Տեղական դեղագործները համաձայն են գումարի մասը ետ չստանալ, սակայն այդ դեպքում նրանք առաջարկում են նվազեցնել կրկնակի գրանցման համար գանձվող գումարի չափը, իսկ գրանցումն անժամկետ դարձնել: Առաջարկվում է նաեւ վերանայել գները պարզեցված կարգով գրանցման դեպքում:

Այս մոտեցումները, դեղարտադրողների խոսքով, գործում են ԱՊՀ շատ երկրներում, իսկ դեղերի առաջնային գրանցման համար գանձվող գումարը այդ երկրներում շատ ավելի փոքր է՝ Հայաստանի համեմատ: Այսպես, Վրաստանում դեղերի գրանցման համար գանձվում է $230, կրկնակի գրանցման համար՝ $90, Ուզբեկստանում երկու գործընթացն էլ արժե $500, Բելառուսում՝ $900, իսկ Հայաստանում այդ գումարը կազմում է 900 հազար դրամ կամ $2000:

Ինչպես նշեց NEWS.am Medicine-ի թղթակցի հետ զրույցում Հայաստանի դեղ արտադրողների ու ներկրողների նախագահ Սամվել Զաքարյանը, քանի որ ԱՀԿ պահանջներից ելնելով՝ այս ոլորտի բոլոր սուբյետկների համար պետք է հավասար մրցակցային պայմաններ ստեղծել, ՀՀ իշխանությունները ժամանակին սահմանել են նույն գինը՝ եւ ներմուծողների, եւ արտադրողների դեղերի գրանցման համար: Իսկ տեղական արտադրությունը խթանելու համար որոշում էր ընդունվել վերադարձնել գրանցման համար գանձվող գումարի 75 տոկոսը՝ սուբսիդիայի տեսքով: Սա, Ս.Զաքարյանի խոսքով, պետության կողմից տեղական արտադրողներին տրամադրվող միակ իրական օգնությունն էր:

Այժմ, նոր փոփոխությունների համաձայն, այս կանոնը կարող է վերանալ: Ս. Զաքարյանը նշեց, որ նախագծի սկզբնական տարբերակը, որն ուղարկվել էր կառավարություն դեռեւս երկու տարի առաջ, համաձայնեցված էր Միության անդամների հետ եւ համապատասխանում էր GMP չափանիշներին: Օրենքն այդպես էլ չընդունվեց, եւ Հայաստանի՝ ԵԱՏՄ-ին միանալու ֆոնին նորից անհրաժեշտություն առաջացավ՝ օրենքում փոփոխություններ անելու: Սակայն վերջին քննարկումները, Ս.Զաքարյանի խոսքով, Առողջապահության նախարարությունում անցել են փակ ֆորմատով՝ առանց ոլորտի ներկայացուցիչների: Եվ այս գործելակերպը տարակուսանք է առաջացնում Միության անդամների մոտ, քանի որ դեռեւս երեք տարի առաջ Միության եւ կառավարության միջեւ հուշագիր էր ստորագրվել, որի համաձայն՝ օրենսդրական բոլոր փոփոխությունները պետք է քննարկվեն ոլորտի ներկայացուցիչների հետ: Սակայն մեկ տարի առաջ կառավարության փոփոխությունից հետո նրանց պարզապես տեղյակ են պահում՝ արդեն իսկ տեղի ունեցած փաստի մասին: 

«Ուսումնասիրելով օրենքի վերջին տարբերակը՝ մենք դրանում մի շարք անհամապատասխանություններ ենք գտել: Կասկածից վեր է, որ այսպիսի օրենսդրությամբ կարգավորվող ոլորտը ԵԱՏՄ-ին միանալու համատեքստում շատ լուրջ խնդիրներ է ունենալու: Օրենքով նաեւ առաջարկվում է փոխել գրանցման համար գանձվող գումարը, ինչպես նաեւ գրանցման կարգը: Այս ամենն անընդունելի է», - նշեց Ս.Զաքարյանը:

Նրա խոսքով՝ Հայաստանում, գրանցման սովորական կարգից զատ, ընդունված է նաեւ պարզեցված կարգը՝ այն դեղերի համար, որոնք գրանցված են ԵՄ-ում, ԱՄՆ-ում եւ Ճապոնիայում: Սակայն եւ պարզեցված, եւ սովորական ընթացակարգով գրանցման համար նույն գումարն է գանձվում, ինչը անտրամաբանական է, քանի որ Դեղերի փորձագիտական կենտրոնի ծախսերը երկրորդ դեպքում մինիմալ են: Ելնելով այս ամենից՝ դեղ արտադրողներն ու ներմուծողները Դեղերի փորձագիտական կենտրոնի ներկայացուցիչների հետ կայացած հանդիպման ընթացքում մշակել ու առաջարկել են իրենց տարբերակը: Նրանք համաձայն են վճարել 900 հազար դրամ դեղերի առաջին գրանցման համար, սակայն կրկնակի գրանցումը պետք է արժենա 300 հազար դրամ եւ պետք է լինի անժամկետ: Այժմ դեղագործական ընկերությունները դեղերը գրանցում են հինգ տարին մեկ: Պարզեցված կարգով գրանցումը եւս պետք է ավելի էժան լինի: ՀՀ Առողջապահության նախարարությունը այս պահանջներին առայժմ չի արձագանքել:

Հետևեք NEWS.am Medicine-ին Facebook-ում և Twitter-ում