Երեխայի մաթեմատիկական ունակությունները պայմանավորված են հղիության ընթացքում մոր հորմոններով

Եթե Դուք մաթեմատիկական ունակություններ չունեք, դրանում մեղավոր են Ձեր մայրիկի հորմոնները հղիության ընթացքում. վահանաձեւ գեղձի տիրոքսին հորմոնի պակասը 60 տոկոսով բարձրացնում է հավանականությունը, որ ծնված երեխան մաթեմատիկայի հետ խնդիրներ կունենա: Այս մասին պատմում են նիդեռնալդական VU University Medical Centre–ի մասնագետները:

Հետազոտության հեղինակ Մարտին Ֆինկենը ու նրա գործընկերները ՝ վերոնշյալ կենտրոնից, հղիության 12-րդ շաբաթում չափել են տիրոքսին հորմոնի մակարդակը 1196 կանանց մոտ: Հետո գիտնականները հինգ տարի հետեւել են այդ կանանցից ծնված երեխաներին: Հինգ տարեկանում երեխաները թեստեր են հանձնել, որոնց միջոցով ստուգել են նրանց լեզվաբանական ու մաթեմատիկականն ունակությունները:

Պարզվում է, որ այն երեխաները, ում մայրերը տիրոքսինի ցածր մակարդակ են ունեցել, ամենացածր գնահատականներն են ստացել մաթեմատիկական առաջադրանքներից: Նույնիսկ հաշվի առնելով այդ երեխաների ընտանեկան պատմությունները ու մի շարք այլ գործոններ՝ նրանց գնահատականը միեւնույն է շատ ավելի ցածր է, քան այն երեխաներինը, ում մայրերի մոտ այդ հորմոնը նորմալ մակարդակի վրա էր:

Բժիշկ Ֆինկենի խոսքով, հնարավոր է հղիության ընթացքում հորմոնալ հավելանյութերի ընդունումը կնպաստի մոր արգանդում երեխայի ուղեղի զարգացմանը: Իսկ այդ հորմոնի պակասը շատ գիտնականներ պատճառաբանում են ժամանակակից մարդկանց սնդնակարգում յոդի պակասով:

Այդ մասին հայտնում է European Journal of Endocrinology ամսագիրը:

Հետևեք NEWS.am Medicine-ին Facebook-ում և Twitter-ում