ՄԻԱՎ-ով վարակման բարձր ռիսկի խմբերին սովորաբար դասում են այն կանանց, որոնք ներգրավված են սեքս-բիզնեսում, տղամարդկանց հետ սեռական հարաբերություններ ունեցող տղամարդկանց եւ նրանց, ովքեր ներարկումով թմրանյութեր են ընդունում: Սակայն Հայաստանում, ինչպես մեզ պատմել է Հայաստանի առողջապահության փոխնախարար Վահան Պողոսյանը, ռիսկի բոլոր այդ խմբերում ՄԻԱՎ-ի տարածվածությունը չի գերազանցում 5%:
Հետաքրքիր է, որ Հայաստանում ՄԻԱՎ-ն ավելի շատ տարածված է աշխատանքային միգրանտների շրջանում, ոչ թե ռիսկի ավանդական խմբերում: ՁԻԱՀ-ի կանխարգելման հանրապետական կենտրոնի ղեկավար Սամվել Գրիգորյանի տվյալների համաձայն, Հայաստանում ՄԻԱՎ-ով վարակվածների մոտ 73% աշխատանքային միգրանտներ են (հատկապես նրանք, ովքեր աշխատելու էին մեկնել Ռուսաստան) եւ նրանց սեռական զուգընկերները կամ կանայք:
ՄԻԱՎ-ի կանխարգելման եւ բուժման ոլորտում նվաճում կարելի է համարել այն, որ 2001-ից ի վեր Հայաստանում դոնորական արյան միջոցով վարակման ոչ մի դեպք չի եղել: Իսկ 2007-ից ի վեր չի եղել մորից երեխային ՄԻԱՎ-ի փոխանցման որեւէ դեպք այն թերապիայի շնորհիվ, որ ՄԻԱՎ-ով վարակված կանայք ստացել են հղիության ընթացքում: Իմիջիայլոց, մեր երկրում, ՄԻԱՎ-ով վարակված հղի կանանց տոկոսը 1-ից էլ ցածր է, ինչը, փոխնախարարի խոսքով, մատնանշում է Հայաստանում կանխարգելման միջոցառումների արդյունավետությունը:
Այսօրվա դրությամբ հղի կանանց 95% եւ թոքաբորբով բոլոր հիվանդները ՄԻԱՎ-ի անալիզ են հանձնում: Հետազոտություններ են անցկացվում նաեւ երկրի շրջաններում` այն շարժական կլինիկայի շնորհիվ, որ Հայաստանին է նվիրել Ռուսաստանի Դաշնությունը: Այդ հետազոտությունների ընթացքում հատուկ ուշադրություն է դարձվում խոցելի խմբերին` աշխատանքային միգրանտներին եւ նրանց ընտանիքներին:
Հիշեցնենք, որ մասնագետները մի շարք խորհուրդներ են տվել այն մասին, թե ինչպես է հնարավոր արտասահմանում աշխատելու ընթացքում խուսափել ՄԻԱՎ-ով վարակվելուց:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր