Շատ մասնագետներ պնդում են, թե կարմիր միսը վտանգավոր է առողջության համար եւ բարձրացնում է քաղցկեղի մի քանի տեսակների զարգացման ռիսկը, մասնավորապես` աղիների: Քաղցկեղի դեմ պայքարի իսրայելական ասոցիացիայի ներկայացուցիչները պատմել են, թե ինչպես է ճիշտ օգտագործել կարմիր միսը` նվազեցնելու ռիսկը:
Նրանց կարծիքով, կարմիր միսը (տավարի, ոչխարի, խոզի) պետք է ուտել միայն կանաչ բանջարեղենի հետ: Միաժամանակ մասնագետները վկայակոչում են մի հետազոտություն, որն անցկացվել է Նիդերլանդներում եւ ցույց է տվել, որ մարդու աղիներում կարմիր մսի քայքայման դեպքում երկաթի հատուկ մոլեկուլ է արտազատվում (HEME), որը քաղցկեղածին ազդեցություն ունի: Այն կարող է չեզոքացնել միայն քլորոֆիլ նյութը, որը պարունակվում է կանաչ գույնի բանջարեղենում:
Գիտնականները հաշվարկել են, որ հակաքաղցկեղային ազդեցության համար անհրաժեշտ է, որ ափսեում կանաչ բանջարեղենի ծավալը 3 անգամ գերազանցի մսի չափաբաժինները:
Ամենից շատ քլորոֆիլ են պարունակում սպանախը, բրոկկոլին, ծաղկակաղամբը եւ սպիտակ կաղամբը, վարունգները, նեխուրը, ինչպես նաեւ հազարի եւ ցանկացած կանաչեղենի բոլոր տարբերակները, հատկապես` մաղադանոսը, համեմը, սամիթը եւ ռեհանը: Համապատասխանաբար, հենց այդ բանջարեղենից եւ կանաչիներից պիտի կազմված լինի մսային հյուրասիրության խավարտը, պնդում են գիտնականները:
Հիշեցնենք, որ բջջանյութի պարունակության շնորհիվ այդ բանջարեղենները նաեւ բարելավում են աղիների աշխատանքը եւ նույնիսկ օգնում են ազատվել ավելորդ քաշից:
Հետևեք NEWS.am Medicine-ին Facebook-ում և Twitter-ում