Իսպանացի բժիշկները գրանցել են երկրում Զիկա վիրուսի սեռական եղանակով փոխանցման առաջին դեպքը: Կինը վարակվել է իր զուգընկերոջից, որը ապրիլին վերադարձել էր Բրազիլիա, հայտնում է El País-ը:
Առողջապահության նախարարության տվյալների համաձայն, Իսպանիայում արդեն Զիկա տենդով վարակման 158 դեպք է գրանցվել, դրանցից 21-ը հղի կանայք են:
Հիշեցնենք, որ Զիկա տենդը սուր վարակիչ հիվանդություն է, որը մարդուն փոխանցվում է մոծակներից եւ բնութագրվում է բարորակ ընթացքով տենդով: Վիրուսն առավել վտանգավոր է հղի կանանց համար, որովհետեւ պտղի մոտ միկրոցեֆալիա է առաջացնում ուղեղի պոտենցիալ ծանր վնասվածքներով:
Սեռական եղանակով վիրուսի փոխանցման դեպքեր ավելի վաղ արձանագրվել էին այլ երկրներում: Կարծիք կա նաեւ, որ վիրուսը կարող է փոխանցվել օրալ սեքսի միջոցով:
Առողջության համաշխարհային կազմակերպությունն ավելի վաղ հայտնել էր, որ Զիկա տենդի բռնկում է ակնկալում աշխարհի շատ երկրներում, նույնիսկ նրանցում, որտեղ այն նախկինում չի եղել: Վտանգված է նաեւ եվրոպական տարածաշրջանը:
Հետևեք NEWS.am Medicine-ին Facebook-ում և Twitter-ում