Մի քանի պարզ կանոնը կարող են օգնել վերահսկել ձեր քաշը եւ չգիրանալ: Այդ կանոնների մասին է պատմել The Challenger ամսագիրը.
1. Ավելի շատ բջջանյութ օգտագործեք
Բջջանյութը հագեցածության երկարատեւ զգացողություն է առաջացնում եւ բջջանյութի շնորհիվ մենք ավելի քիչ ենք ուտում, քան կուտեինք առանց դրա, հենց այդ պատճառով մասնագետները խորհուրդ են տալիս սննդում հնարավորինս շատ ներառել բջջանյութ պարունակող մթերքներ:
Բջջանյութով են հարուստ հում բանջարեղենը եւ հում մրգերը, սերմերը եւ ընկույզները, ինչպես նաեւ ամբողջական ցորենից շիլաները: Բայց հիշեցնենք, որ բջջանյութի հետ միասին անպայման անհրաժեշտ է բավականաչափ ջուր խմել` օրական երկու լիտրից ոչ պակաս, որովհետեւ բջջանյութով մթերքները փքվելու հատկություն ունեն եւ «խլում են» օրգանիզմի խոնավության մի մասը:
2. Ավելի շատ աղցան կերեք
Հաջորդ խորհուրդը սննդին ավելի շատ աղցաններ ավելացնելն է: Լավ աղցանում պետք է շատ բանջարեղեն եւ կանաչի լինի, ճարպի միայն մի տարատեսակ (կամ` պանիր, կամ ձիթապտղի յուղ, կամ թթվասեր, բայց ոչ մի դեպքում բոլորը միասին) եւ սպիտակուցի աղբյուր (ձվի սպիտակուց, բակլա): Նման աղցանն արագ հագեցնում է եւ թույլ չի տալիս ավելորդ կալորիաներ ուտել:
3. Ֆիզիկապես ակտիվ եղեք օրական գոնե 30 րոպե
Քաշը պահպանելու հաջորդ կանոնը օրական առնվազն 30 րոպե ֆիզիկական ակտիվությունն է: Կարելի է վարժություններ կատարել, պարերով զբաղվել, քայլել, աստիճաններով բարձրանալ, տնտեսական լուրջ աշխատանք կատարել: Օրական կես ժամ նման ակտիվությունը բավարար է, որ առանց հացադուլների եւ հոգնեցնող մարզումների սլացիկ կազմվածք ունենաք, նշում են մասնագետները:
4. Լավ քնեք
Նորմալ քունը եւս օգնում է պահպանել քաշը եւ ավելորդ կիլոգրամներ չհավաքել: Քիչ քնելու պատճառով օրգանիզմում ընկնում է սոմատոտրոպ հորմոնի մակարդակը, որն օգնում է ճեղքել ճարպային բջիջները էներգիա ստանալու համար եւ պահպանել նորմալ քաշը, արդյունքում մարդիկ ավելի շատ եւ ավելի կալորիական սնունդ են ուտում:
Հետևեք NEWS.am Medicine-ին Facebook-ում և Twitter-ում