Լոռիի մազի Վանաձոր քաղաքում հղի կինն իր 7-ամյա երեխայից կապույտ հազով է վարակվել, ում ժամանակին հենց ինքն է հրաժարվել պատվաստել: Այս մասին լրագրողների հետ հանդիպմանն ասել է առողջապահության փոխնախարար Սերգեյ Խաչատրյանը:
Բացառված չէ, որ հիվանդությունը կարող է կնոջ մոտ, ում անունը չի հրապարակվում, վիժում առաջացնել: Մասնագետների գնահատմամբ՝ բացառված չէ նաեւ հղիության արհեստական ընդհատման տարբերակը, քանի որ կնոջ եւ պտղի մոտ արդեն իսկ ինչ-որ բարդացումներ կան:
Փոխնախարարի խոսքով՝ երկու դեպքում էլ վարակի պատճառը պատվաստումից հրաժարվելն է. երեխան ինֆեկցիայի նկատմամբ ընկալունակ էր եւ բախվելով դրա հարուցիչին՝ հիվանդացել է, որից հետո վարակել է հղի մորը, ով նույնպես այդ հիվանդության նկատմամբ ընկալունակ էր:
Փոխնախարարը հիշեցրել է, որ անցյալ տարի Հայաստանում գրանցվել է ինֆեկցիոն հիվանդությունների դեմ պատվաստվելուց հրաժարվելու պատճառով երեխաների մահվան երկու դեպք. 3 ամսական երեխան մահացել էր կապույտ հազից, որի դեմ չէր պատվաստվել, մյուս երեխայի մահվան պատճառը կարմրուկով վարակվելուց հետո առաջացած բարդություններն էին:
Սերգեյ Խաչատրյանը ծնողներին կոչ է անում չվախենալ իրենց երեխաներին ինֆեկցիոն հիվանդությունների դեմ պատվաստելուց, քանի որ այդ հիվանդություններով վարակվելու հետեւանքները կարող են շատ ավելի լուրջ լինել, քան պատվաստանյութի մասին առասպելական վտանգները, որոնց մասին գրում են համացանցում:
Փոխնախարարի խոսքով՝ Հայաստանն այսօր ներմուծում է որակյալ պատվաստանյութեր, պատվաստաումն էլ բարձր մակարդակով է կազմակերպվում: «Այդ ոլորտում մենք մեծ հաջողությունների ենք հասել, եւ շատ երկրներ մեզանից սովորելու բան ունեն»,- նշել է Սերգեյ Խաչատրյանը:
Հետևեք NEWS.am Medicine-ին Facebook-ում և Twitter-ում