Ամերիկյան FDA-ն հավանություն է տվել MiniMed 670G ենթաստամոքսային գեղձին, որը ներկայացվել է Medtronic ընկերության կողմից եւ նախատեսված է 14 տարեկանից մեծ հիվանդների դիաբետի բուժման համար: Հետաքրքիր է, որ սարքն ավելի վաղ է հավանության արժանացել, քան ենթադրվում էր. ակնկալվում էր, որ FDA-ն իր որոշումը կհրապարակի 2017 թվականի գարնանից ոչ շուտ:
Սարքը կազմված է զգայուն սենսորից եւ ինսուլինային պոմպից: 1-ին տեսակի դիաբետով հիվանդների մոտ այն ավտոմատ կերպով 5 րոպեն մեկ չափում է արյան մեջ շաքարի մակարդակը եւ ինսուլինի անհրաժեշտ չափաքանակն է ներմուծում: MiniMed 670G օգտագործող հիվանդներն այլեւս կարիք չունեն մշտապես հետեւել շաքարի մակարդակին եւ ինքնուրույն ներարկումներ անել. անհրաժեշտ է ընդամենը տվյալներ մտցնել սննդի ընդունման եւ ֆիզիկական ծանրաբեռնվածության մասին: Մշակողները կարծում են, որ սարքն էականորեն կթեթեւացնի հիվանդների կյանքը, չէ որ ոմանց մոտ ներարկման անհրաժեշտությունն իսկ սթրես է առաջացնում:
Ինսուլինային պոմպեր են օգտագործում դիաբետով շատ հիվանդներ, սակայն նրանք ստիպված են ձեռքով չափել շաքարի մակարդակը: Դիաբետով այլ հիվանդներ կրելի սենսորներ են օգտագործում, որոնք ի վիճակի չեն ինսուլինային ներարկումներ անել: Medtronic ընկերության ստեղծած արհեստական ենթաստամոքսային գեղձն օգտագործման համար թույլատրված առաջին սարքն է, որն այս երկու գործառույթն էլ իրականացնում է: Նման սարքերի մշակմամբ զբաղվում են նաեւ այլ արտադրողներ:
Սարքի գինն առայժմ պաշտոնապես չի հայտարարվել, բայց ենթադրվում է, որ MiniMed 670G-ը մոտ 5000-8000 դոլար կարժենա: Այդ գումարի մեջ ներառված չէ սենսորի արժեքը, որն անհրաժեշտ է ամեն տարի փոխել. այն եւս մի քանի հազար դոլար կարժենա:
Հետևեք NEWS.am Medicine-ին Facebook-ում և Twitter-ում