Ձյան առատ տեղումների ժամանակ տղամարդկանց մոտ մեծանում է վտանգավոր սրտի կաթվածի առաջացման վտանգը: Այս մասին նախազգուշացրել են Մոնրեալի համալսարանի (Կանադա) մասնագետները:
Նրանց խոսքով՝ ի տարբերություն առանց տեղումների ժամանակաշրջանի, ձյան դեպքում սրտի կաթվածի ռիսկը մեծանում է 16%-ով, իսկ առնվազն 20 սմ ձյան դեպքում մահվան վտանգը մեծանում է 34%-ով:
Հետաքրքիր է, որ կանանց պարագայում նման կապ չի հայտնաբերվել:
Փարձագետները վերլուծել են 1981-2014 թվականներին Քվեբեկում սրտի կաթվածների պատճառով հոսպիտալացման 128.073 եւ մահվան 68.155 դեպքերի մասին տվյալները: Պարզվել է, որ մահվան դեպքերի մեկ երրորդն արձանագրվել է ձյան տեղումների հաջորդ օրը, իսկ շուրջ 10%-ը, երբ առնվազն 5 սմ ձյուն է տեղացել: Հետազոտությունը նաեւ ցույց է տվել, որ եթե ձյան տեղումները նվազագույնը մեկ օր են տեւել, տղամարդիկ 8%-ով ավելի հաճախ են հիվանդանոց ընկել, 12%-ով ավելի հաճախ՝ մահացել:
Գիտնականները ենթադրում են, որ ձյունը մաքրելու ընթացքում տղամարդիկ վնաս են հասցնում առողջությանը, եթե սովորական բահ են օգտագործում: Ռիսկային խմբում են հատկապես քիչ շարժունակ կենսակերպ վարող եւ սրտի խնդիրներ ունեցող 50 տարեկանն անց տղամարդիկ:
Հետևեք NEWS.am Medicine-ին Facebook-ում և Twitter-ում