Քաղցկեղով հիվանդությունների 30 տոկոսը կարելի է կանխել առողջ սնունդի միջոցով, նշված է Journal of the Academy of Nutrition and Dietetics ամսագրում հրապարակված հոդվածում:
Արիզոնայի համալսարանի գիտնականները պարզել են, որ էներգետիկ մեծ խտությամբ (DED) մթերքների օգտագործումը կանանց մոտ հետդաշտանադադարի ժամանակ կապված է օնկոլոգիայի զարգացման մեծ հավանականության հետ: Հետազոտողները նման եզրակացության են հանգել՝ վերլուծելով թույլ սեռի 90 հազար ներկայացուցիչների առողջության եւ սննդակարգի մասին տվյալները:
DED-ի ցածր մակարդակով սնունդ նախընտրած (հավի միս, մրգեր, բանջարեղեն եւ լոբազգիներ) կանանց առողջության ցուցանիշները ավելի լավ են եղել՝ ի տարբերություն առավելապես DED-ի բարձր մակարդակով սնունդ (յուղոտ միս, համբուգերներ, պիցա եւ այլն) օգտագործած կամավորների:
Ակնհայտ է, որ DED-ի բարձր մակարդակով սնունդը, հատկապես պարբերական օգտագործման դեպքում, կարող է ճարպակալման պատճառ դառնալ, որը օնկոլոգիայի առաջացման վտանգներից մեկն է:
Սակայն Արիզոնայի համալսարանի գիտնականների հետազոտության արդյունքները ցույց են տվել, որ չարորակ նորագոյացություններ կարող են առաջանալ նաեւ նորմալ քաշով մարդկանց մոտ, եթե նրանց սննդակարգում շատ են DED-ի բարձր մակարդակով մթերքները:
Այս պատճառով բժիշկները խորհուրդ են տալիս հետեւել DED-ի ցածր մակարդակով սննդակարգին, այդ թվում՝ նաեւ բարեկազմ կանանց: Գիտնականների կարծիքով՝ այս եզրակացությունը կարող է արդարացված լինել նաեւ բնակչության մյուս խմբերի համար:
Այս ուղղությամբ գիտնականների հետագա աշխատանքը կապված է մեծահասակ տղամարդկանց եւ դեռահասների առողջության վրա DED-ի ազդեցության գնահատման հետ:
Հետևեք NEWS.am Medicine-ին Facebook-ում և Twitter-ում