Մարդիկ, որոնք մանկության տարիներին քաղցկեղով են հիվանդացել, հատկապես ավելորդ քաշով կամ ճարպակալմամբ տղամարդիկ, 2 անգամ ավելի հաճախ են բախվում հիպերտոնիային, հայտնում են Սուրբ Հուդայի Մանկական հետազոտական հոսպիտալի աշխատակիցները:
Cancer Epidemiology, Biomarkers & Prevention ամսագրում հրապարակված հետազոտության շրջանակում նրանք վերլուծել են 3016 մեծահասակ կամավորների տվյալները: Պարզվել է, որ մանկության տարիներին քաղցկեղը հաղթահարած մարդկանց խմբում հիպերտոնիայի տարածվածությունը 2,6 անգամ ավելի մեծ է եղել, քան սպասում էին: Ըստ որում՝ տարիքին զուգահեռ վտանգը մեծացել է: Այսպես՝ 30 տարեկանում հիպերտոնիայով է տառապել մանուկ տարիքում քաղցկեղով հիվանդացած կամավորների 13 տոկոսը, 40 տարեկանում՝ 37 տոկոսը, իսկ 50 տարեկան դառնալիս՝ 70 տոկոսից ավելին: Մանկության տարիներին քաղցկեղը հաղթահարածների շրջանում ճնշման խնդիրները միջինում 10 տարի ավելի վաղ են սկսվում, քան քաղցկեղով չհիվանդացածների շրջանում:
Մասնագետները հիշեցնում են, որ հիպերտոնիան մեծացնում է սրտի եւ անոթների հետ կապված այլ խնդիրների առաջացման հավանականությունը: Սիրտ-անոթային համակարգի համար վտանգավոր բուժում անցնող մարդկանց շրջանում հետեւանքները կարող են ավելի ծանր լինել: Գիտնականների խոսքով՝ հիպերտոնիան վիճակագրորեն նկատելիորեն չի կապվել քիմիաթերապիայի եւ ճառագայթային թերապիայի հետ:Հետևեք NEWS.am Medicine-ին Facebook-ում և Twitter-ում