Իսպանիայից կինը մահացել է ասեղնաբուժության նկատմամբ ալերգիկ ռեակցիայի հետեւանքով, որի ժամանակ ասեղների փոխարեն օգտագործվել է կենդանի մեղուների խայթոցը:
Հայտնի է դարձել, որ 55-ամյա հիվանդը որոշել է այսպիսի արտառոց եղանակով բուժել սթրեսը եւ մեջքի լարվածությունը: Սակայն մեղուներով ասեղնաբուժության շարքի ընթացքում տիկնոջ մոտ առաջացել է «սուլող շնչառություն», հեղձուկ, նա հանկարծակի կորցրել է գիտակցությունը:
Ապիթերապիան (մեղվաբուժություն) այլընտրանքային բժշկության տեսակ է, որում օգտագործվում են մեղուներից ստացված տարբեր արտադրանքներ, ներառյալ մեղրը, ակնամոմը եւ ծաղկափոշին: Առավել էքստրեմալ միջամտությունների դեպքում, ինչպիսին է «կենդանի մեղվի միջոցով ասեղնաբուժությունը», օգտագործում են մեղվի թույնը: Գործողությունը կատարողը կենդանի մեղվին դնում է հիվանդի մարմնի վրա եւ սեղմում միջատի գլուխը, մինչեւ այն խայթի մարդու մարմինը: Դրանից հետո մեղուն սատկում է:
Այս միջամտության զոհը, ում անունը չի հրապարակվում, 2 տարի շարունակ ամեն ամիս նման բուժում է ստացել: Առաջացած ալերգիայից հետո նա հիվանդանոցում մահացել է մեծ թվով օրգանների չգործելու հետեւանքով:
Հետևեք NEWS.am Medicine-ին Facebook-ում և Twitter-ում