Զույգերը, որոնք ծրագրում են երեխա ունենալ, պետք է իրենց կենսակերպն ու սննդակարգը փոխեն բեղմնավորումից դեռ մի քանի տարի առաջ: Նման եզրակացության են հանգել Լոնդոնի համալսարանական քոլեջի եւ Սաութհեմփթոնի համալսարանի գիտնականները՝ վերլուծելով միլիոնավոր ապագա ծնողների մասնակցությամբ խոշորագույն հետազոտության տվյալները:
Հետազոտողների տվյալներով՝ ծնողների սննդակարգն ու առողջական վիճակն էականորեն ազդում են երեխաների աճի, զարգացման եւ առողջության վրա: Չնայած սրան՝ շատ կանայք ունեն ավելորդ քաշ եւ սնվում են ոչ ճիշտ, ավելին՝ իրենց երեխաներին լուրջ հիվանդությունների վտանգին ենթարկում՝ ինչպիսիք են դիաբետն ու քաղցկեղը:
Հետազոտությունը ցույց է տվել, որ կանանց ճարպակալումն ավելացնում է երեխայի՝ ժամանակից շուտ ծնվելու եւ ծննդաբերության ժամանակ բարդությունների հավանականությունը: Ճարպակալումը եւ ոչ ճիշտ սնվելը կարող են առաջացնել գենետիկ, բջջային, մետաբոլիկ եւ ֆիզիոլոգիական փոփոխություններ մոր արգանդում երեխայի զարգացման ժամանակ: Իսկ տղամարդկանց ճարպակալումը կապված է սերմնահեղուկի ցածր որակի հետ, որը հետագայում կարող է հանգեցնել երեխայի մոտ քրոնիկ հիվանդությունների զարգացման:
Վաղուց հայտնի են նաեւ երեխայի մոտ որոշ խնդիրների կանխարգելման մյուս միջոցներ: Օրինակ՝ արատների զարգացման ռիսկը նվազեցնելու համար պետք է ֆոլաթթու ընդունել: Սակայն շատ կանայք դա չեն անում: Փորձագետները շեշտում են, որ ապագա ծնողներին պետք է տեղեկացնել վտանգների մասին եւ դրդել նրանց փոխել կենսակերպը:
Հետևեք NEWS.am Medicine-ին Facebook-ում և Twitter-ում