Օրական նույնիսկ մեկ ալկոհոլային ըմպելիքը մեծացնում է բերանի խոռոչի քաղցկեղի զարգացման վտանգը, պարզել են ԱՄՆ-ից հետազոտողները: Այս մասին նրանք հայտնել են Microbiome ամսագրում:
Հետազոտությանը մասնակցել է 55-87 տարեկան 1044 կամավոր: Նրանցից 270-ը ընդհանրապես ալկոհոլ չի օգտագործել, 614-ը չափավոր է խմել, իսկ 160-ը ալկոհոլը չարաշահել է: Նրանց բերանի խոռոչի միկրոֆլորայի հետազոտությունը ցույց է տվել, որ մասնակիցները որքան շատ են խմել, այնքան նրանց բերանում հիվանդածին բակտերիաներն ավելի մեծաթիվ են եղել, որոնք առաջացրել են լնդերի հիվանդություններ եւ ոչնչացրել են օգտակար բակտերիաները:
Ալկոհոլի օգտագործումը նվազեցրել է նաեւ լնդերի առողջության համար օգտակար լակտոբացիլների քանակությունը: Միկրոբիոմում համանման փոփոխությունները վերջնարդյունքում կարող են բերել բերանի խոռոչի եւ մարսողության օրգանների քաղցկեղի, կարծում են հետազոտության հեղինակները:
Հետազոտողներն այս փաստը բացատրում են այն երեւույթով, որ ալկոհոլային խմիչքներում պարունակվող թթուները բերանի խոռոչը թշնամական են դարձնում որոշակի բակտերիաների զարգացման համար: Ալկոհոլը նաեւ նպաստում է ալկոհոլի տարրալուծման վնասակար կողմնակի արտադրանքի կուտակմանը, այդ թվում՝ քիմիական նյութերի, որոնք կոչվում են ացետալդեհիդներ եւ բերանում ծխախոտի ծխի վնասակար տոքսինների հետ արտադրվում են որոշ բակտերիաների կողմից:
«Մեր հետազոտությունը հստակ ապացուցում է, որ ալկոհոլի օգտագործումը վատ է անդրադառնում բերանի մեջ մանրէների առողջ հավասարակշռության պահպանման վրա եւ կարող է օգնել բացատրել, թե ինչու է ալկոհոլի օգտագործումը, ինչպես եւ ծխելը, բերում բակտերիալ փոփոխությունների, որոնք կարող են քաղցկեղ եւ քրոնիկական հիվանդություններ առաջացնել»,- ասել է Նյու Յորքի համալսարանից ավագ հետազոտող, համաճարակաբան Ջյուինգ Անը:
Այնուհետեւ գիտնականները պատրաստվում են պարզել, թե ինչի հաշվին է ալկոհոլը բերանի միկրոֆլորայում փոփոխություններ առաջացնում՝ ոչնչացնո՞ւմ է արդյոք օգտակար բակտերիաները, թե՞ վատերի համար բարենպաստ պայմաններ է ստեղծում: Առայժմ նաեւ հայտնի չէ՝ ալկոհոլից հրաժարվելն արդյոք օգնո՞ւմ է միկրոֆլորայի վերականգնմանը:
Հետևեք NEWS.am Medicine-ին Facebook-ում և Twitter-ում