Բուսական հավելումների հետ պրոբիոտիկների օգտագործումը կյանքի տեւողությունը երկարացնում է: Այսպիսի եզրահանգում են կատարել Մաքգիլի համալսարանի գիտնականները, հայտնում է EurekaAlert-ը:
Կենսաինժեներիայի ոլորտի մասնագետները փորձեր են անցկացրել մրգային ճանճերի վրա: Նրանց կերակրել են սիմբիոտիկներով (պրոբիոտիկի եւ պոլիֆենոլի համակցություն) եւ տրիֆալայով (բուսական հավելում):
Գիտնականներին հաջողվել է այս նյութերի միջոցով ճանճերի կյանքի տեւողությունը երկարացնել մինչեւ 66 օրով: Սա 26 օրով ավելի երկար է, քանի այն միջատներինը, որոնց օրգանիզմը սիմբիոտիկներ եւ տրիֆալա չի ստացել: Բացի այդ՝ կենսաինժեներները կարողացել են նվազեցնել ծերացման բացասական արդյունքը:
Գիտնականները փորձի դրական արդյունքը կապում են աղիքային ուղիներում բակտերիաների վիճակի հետ:
«Պրոբիոտիկներն էապես փոխում են աղիների միկրոբիոտիկան, ոչ միայն բաղադրությունը, այլեւ մեր կերած մթերքների մետաբոլիզմը»,- պարզաբանել է հետազոտության ղեկավար, պրոֆեսոր Սաթիա Փրաքաշը:
Փրաքաշը նշել է, որ մրգային ճանճերի եւ կաթնասունների կենսաքիմիական ռեակցիաները 70 տոկոսով համընկնում են՝ պարզաբանելով, որ համանման արդյունքի կարելի է հասնել նաեւ մարդու վրա ներգործելիս:
«Մարդկանց վրա դա այնքան էլ տպավորիչ էֆեկտ չի ունենա, սակայն մեր ստացած արդյունքները թույլ են տալիս ենթադրել, որ այս պրոբիոտիկների հետ միասի տրիֆալա պարունակող սննդակարգը կնպաստի երկարատեւ եւ առողջ կյանքին»,- ամփոփում է գիտնականը:
Հետևեք NEWS.am Medicine-ին Facebook-ում և Twitter-ում