Շատ հաճախ հակաբիոտիկներով բուժման ընթացքում խորհուրդ են տալիս ընդունել նաեւ պրոբիոտիկներ՝ «օգտակար մանրէներ», որոնք պետք է վերականգնեն աղիքային միկրոֆլորան: Սակայն նոր հետազոտությունները ցույց են տալիս, որ պրոբիոտիկները կարող են լինել ոչ այնքան օգտակար, որքան շատերին է թվում:
Առաջին հետազոտության մեջ, որը հրապարակվել է հեղինակավոր Cell գիտական ամսագրում, գիտնականները կատարել են մի շարք էնդոսկոպիաներ եւ կոլոնոսկոպիաներ՝ մարդկանցից վերցնելու համար միկրոբիոմի նմուշ պրոբիոտիկների ընդունումից առաջ եւ հետո՝ հակաբիոտիկներով բուժման ֆոնին: Մարդկանց մի խումբը ստացել է միկրոօրգանիզմներ, որոնք հավաքվել են աղիքներից՝ մինչեւ հակաբիոտիկների ընդունումը:
Գիտնականները նկատել են, որ այն մարդկանց միկրոբիոմը, ովքեր ստացել են պրոբիոտիկներ, զգալիորեն վնասվել է: Երբ պրոբիոտիկների մանրէները «բնակվել են» աղիքներում, դրանք ճնշել են հակաբիոտիկների օգտագործումից խախտված՝ մարդու սեփական միկրոբիոմի վերականգնումը: Խախտվել է նաեւ գեների արտահայտչականությունը, այսինքն՝ ԴՆԹ-ում սպիտակուցների սինթեզի գործընթացը:
Այն խմբում, որը ստացել է սեփական մանրէներ, այսպիսի բացասական փոփոխություններ չեն նկատվել, նրանց աղիքային միկրոբիոմը մի քանի օրում վերականգնվել է:
Գիտնականները նաեւ պարզել են, որ մանրէների հետազոտությունը մարդու կղանքում չի կարող համարվել հուսալի միջոց՝ ուսումնասիրելու համար աղիքային միկրոբիոմի վիճակը:
Մյուս հետազոտության շրջանակներում, որը հրապարակվել է նույն ամսագրում, մասնագետներն ուսումնասիրել են աղիքային միկրոբիոմի փոփոխությունը պրոբիոտիկների ազդեցության տակ: Մի խումբը ստացել է տարածված պրոբիոտիկներ, մյուսը՝ պլացեբո:
Հեղինակները զարմացած էին, որ հայտնաբերել են պրոբիոտիկների երկու տարբեր ռեակցիաներ: Մարդկանց մի մասի աղիքները դիմադրել են այս բակտերիաների «բնակեցմանը», իսկ մյուսների դեպքում պրոբիոտիկներն «աճել են», փոխել են միկրոբիոմը եւ ազդել ԴՆԹ-ի աշխատանքի վրա: Սա նշանակում է, որ պրոբիոտիկները ոչ բոլորը կարող են ընդունել, ուստի յուրաքանչյուր հիվանդի համար պահանջվում է անհատական մոտեցում:
Հետևեք NEWS.am Medicine-ին Facebook-ում և Twitter-ում