Չինաստանում արյունոտ միս ուտելու սիրահարի ուղեղից հանել են 10-սանտիմետրանոց ողջ որդ: Այս մասին հայտնում է South China Morning Post պարբերականը:
Միջադեպը տեղի է ունեցել Ցզյանսի նահանգի կենտրոն Նանչան քաղաքում: Մի քանի ամիս շարունակ 26-ամյա Լյուն տառապում էր էպիլեպսիայի նոպաներից, եւ նրա բժիշկը չէր կարողանում գտնել հիվանդության պատճառը: Հիվանդին ուղարկել են շրջանի կենտրոնական հիվանդանոց, եւ արյան անալիզները ցույց են տվել, որ նրա օրգանիզմում ժապավենաձեւ ճիճու է բնակվում՝ Spirometra mansoni:
Հետագա հետազոտությունները ցույց են տվել, որ մակաբույծը տեղավորվել է ուղեղում: Բժիշկները չինացու ուղեղից որդը հանել են, որից հետո ճիճուն կենսունակ է մնացել եւ փորձանոթում լողալու հատկությունից չի զրկվել:
Բժիշկների կարծիքով՝ Լյուն ճիճվի ձվերով վարակվել է գրիլի լավ չտապակած միսը ուտելիս, որը նրա սիրած ճաշատեսակներից մեկն է:
Նեյրովիրաբուժության Շանհայի կենտրոնի նախագահ Գո Հուեյը նշել է, որ հիվանդությունը հաճախ է հանդիպում աղտոտված ջրով շրջաններում, նաեւ այն մարդկանց մոտ, որոնք ուտում են հում կամ կիսաեփ միս, ձուկ եւ ծովամթերք: Որդի ձուն կամ թրթուրը օրգանիզմի մեջ ընկնելով՝ հայտնվում է արյան հոսքի մեջ, այնուհետեւ բնակություն է հաստատում օրգաններից մեկում:
Քանի որ սրտի միջոցով տեղափոխվող ամբողջ արյան քառորդ մասը ուղեղ է մատակարարվում, հավանականությունը շատ մեծ է, որ ճիճուն հենց այնտեղ կտեղավորվի: Նման դեպքում հիվանդը կարող է գլխացավեր, սրտխառնոց, արյունահոսություն եւ էպիլեպսիա ունենալ:
Հետևեք NEWS.am Medicine-ին Facebook-ում և Twitter-ում