Գիտնականներն ավելորդ քաշի դեմ պայքարի նորարարական մեթոդ են առաջարկել: Մադիսոնում Վիսքոնսինի համալսարանից մասնագետներն առաջարկում են նիհարել թափառող նյարդի խթանման միջոցով, որն ուղեղից անցնում է որովայնային խոռոչ: Հենց այս նյարդի շնորհիվ է ուղեղը ստամոքսից կուշտ լինելու ազդակ ստանում:
Իմպլանտը առաձգական նանոգեներատոր է, որի տրամագիծը 1 սմ-ից փոքր է: Այն օրգանիզմ է մտցվում ինվազիվ միջամտությամբ. իմպլանտն ամրացվում է ստամոքսի մակերեւույթին: Այնուհետեւ ստամոքսի բնական կրճատումների միջոցով այն սկսում է գեներացնել թույլ էլեկտրական իմպուլսներ, որոնք խթանում են թափառող նյարդը:
Արդյունքում կուշտ լինելու մասին ազդակը փոխանցվում է ուղեղ:
Իմպլանտի արդյունավետությունն ապացուցվել է առնետների վրա կատարված փորձարկումներով. փորձարկումը սկսելուց հետո առաջին 18 օրերին կրծողների քաշը նվազել է միջինը 35 տոկոսով: Այս արդյունքը պահպանվել է հաջորդ 75 օրերին:
Ուշագրավ է, որ իմպլանտը հեռացնելուց հետո կրծողները կրկին սկսել են ավելի շատ ուտել եւ արդյունքում գիրացել են: Ստացվում է, որ սարքը միան ժամանակավոր արդյունք է ապահովում, որին հասնելուց հետո մարդը ստիպված է ինքնուրույն հետեւել իր կազմվածքին:
Հաջորդ փուլում փորձարկումները կանցկացվեն ավելի խոշոր կենդանիների վրա:
Հետազոտության վերաբերյալ գիտական հոդվածը հրապարակվել է Nature Communications ամսագրում:
Հետևեք NEWS.am Medicine-ին Facebook-ում և Twitter-ում