Գիտնականներին հաջողվել է գտնել այն հարցի պատասխանը, թե ինչն է ազդում քրոնիկ հոգնածության համախտանիշի վրա(ՔՀՀ): Լոնդոնի թագավորական քոլեջի մասնագետների կարծիքով դրանում «մեղավոր» է իմունային համակարգի չափից ավելի հզոր ռեակցիան:
Առաջին տվյալներն այն մասին, որ ՔՀՀ-ն կարող է կապված լինել իմունային համակարգի չափից ավելի ուժեղ ռեակցիայի հետ, վաղուց են հայտնվել: Հետազոտության հեղինակները նշում են, որ հիվանդները բազմիցս հաղորդել են վիրուսային հիվանդությունից հետո ՔՀՀ-ի զգացողության մասին:
Փորձին ներգրավվել է քրոնիկ հեպատիտ C- ով 55 մարդ, ովքեր ընդունում էին Ինտերֆերոն-ալֆա: Այս դեղամիջոցը իմունային արձագանք է առաջացնում, որն իր հզորությամբ նման է լուրջ վարակի ժամանակ իմունային համակարգի պատասխանին:
Շատ մասնակիցների մոտ բուժման պատճառով հոգնածություն էր նկատվում: Գիտնականները վերլուծել են փորձի մասնակիցների հոգնածության մարկերները եւ իմունային արձագանքը՝ Ինտերֆերոն-ալֆայի բուժման ընթացքում, առաջ եւ հետո:
Արդյունքում քրոնիկ հոգնածության համախտանիշը հայտնաբերվել է 18 մարդու մոտ: Հետագա հետազոտությունները ցույց են տվել, որ նրանց մոտ ինտերլեյկին-10 եւ ինտերլեյկին-6 տեղեկատվական մոլեկուլների քանակը, որոնք խթանում են հզոր իմունային արձագանքը, կրկնակի աճել է:
Ընդ որում հիվանդների տվյալ կատեգորիան թերապիայից առաջ էլ ինտերլեյկինի բարձր աստիճան ուներ, ինչը կարող է վկայել նաեւ օրգանիզմի որոշ նախատրամադրվածության մասին:
Դրա հետ կապված գիտնականները չեն բացառում, որ ՔՀՀ-ն կարելի է նախնական փուլում հայտնաբերել, երբ մարդու մոտ վերոնշյալ մոլեկուլների մեծ քանակություն է նկատվում:
Հետազոտությունը հրապարակվել է Psychoneuroendocrinology ամսագրում:
Հետևեք NEWS.am Medicine-ին Facebook-ում և Twitter-ում