Չինաստանի երկու հիվանդների մոտ հայտնաբերվել է նախկինում անհայտ Enterobacteriaceae շտամներ, որոնք չեն արձագանքել ո՛չ պենիցիլինին, ո՛չ էլ ցեֆալոսպորինին: Այս բակտերիաներն ապրում են աղեստամոքսային տրակտում եւ սովորաբար վտանգ չեն սպառնում, սակայն դրանք բերում են մենինգիտի զարգացմանը, երբ ընկնում են արյան մեջ, իսկ երբ մտնում են թոքերի մեջ`թոքաբորբի:
Բացահայտումը կատարվել է Սիչուանի համալսարանի աշխատակիցների կողմից՝ Արեւմտյան Չինաստանի հոսպիտալում անցկացված ստանդարտ ստուգման ժամանակ: Գենետիկական անալիզը թույլ է տվել բացահայտել երկու յուրահատուկ բակտերիաներ`Enterobacter huaxiensis եւ Enterobacter chuandaensis: Enterobacteriaceae-ի այլ տեսակների մեջ, ԴՆԹ-ի առանձնահատկություններին զուգահեռ, դրանք առանձնանում են որոշակի քանակությամբ շաքարի եւ կալիումի աղերի քայքայման ունակությամբ:
Առողջապահության համաշխարհային կազմակերպությունն արդեն երկար ժամանակ է, ինչ կանխատեսել է «հետհակաբիոտիկների դարաշրջանի» մեկնարկի մասին, երբ հակաբիոտիկները դադարում են ներգործել, քանի որ բակտերիաները կորցնում են իրենց զգայունությունը:
Արդեն այսօր իսկ բժշկությանը հայտնի են ինֆեկցիաներ, որոնք գրեթե կամ ընդհանրապես չեն բուժվում: Դրանց թվում են թոքաբորբի, տուբերկուլյոզի, գոնորեայի եւ սալմոնելոզի վտանգավոր տեսակները: Փորձագետների գնահատականներով, եթե ոչինչ չարվի, շատ շուտով այս հիվանդությունների ցանկը կհամալրվի նորերով, իսկ վարակները նորից կսկսեն մարդկանց սպանել, ինչպես դա եղել է նախքան հակաբիոտիկների գյուտը:
Հետևեք NEWS.am Medicine-ին Facebook-ում և Twitter-ում