Յուրաքանչյուր 36 ժամը մեկ Հայաստանում մի կին հիվանդանում է արգանդի վզիկի քաղցկեղով: Հուլիսի 5-ին այս մասին հայտնեց ԵՊԲՀ համաճարակաբանության ամբիոնի դասախոս Արման Բադալյանը՝ ելույթ ունենալով մարդու պապիլոմա վիրուսի դեմ պատվաստանյութի ներդրման միջազգային փորձին նվիրված քննարկման ժամանակ: Միջոցառումն անցկացվում է Հայ բժիշկների V միջազգային կոնգրեսի շրջանակում:
Նա նշեց, որ Հայաստանում 2017 թվականին գրանցվել է արգանդի վզիկի քաղցկեղի 262 նոր դեպք (56 տոկոսը՝ III-IV փուլերում), իսկ 2018-ին՝ 228 (58 տոկոսը՝ III-IV փուլերում): Այս հիվանդությամբ հիվանդների առավել մեծ թիվը բաժին է ընկնում 44-59 տարեկան կանանց: Ընդ որում՝ հանրապետությունում արգանդի վզիկի քաղցկեղով հիվանդացությունն աճել է: Այսպես՝ եթե 1985 թվականին այս ցուցանիշը 100 հազար կանանց հաշվարկով կազմում էր 9.5, ապա 2017-ին՝ 16.6, իսկ 2018-ին՝ 14.5:
Բադալյանը տեղեկացրեց, որ ամեն տարի գրանցվում է քաղցկեղի այս տեսակի հետեւանքով մահվան շուրջ 100 դեպք: «Կարելի է ասել, որ յուրաքանչյուր 36 ժամը մեկ Հայաստանում մի կին հիվանդանում է արգանդի վզիկի քաղցկեղով»,- հայտնեց նա:
Հայաստանում 2017-ից 2019 թվականն ընկած ժամանակահատվածում մարդու պապիլոմա վիրուսի դեմ «Գարդասիլ» պատվաստանյութ է ստացել 9013 մարդ, որից 6129-ը 14-15 տարեկան անձինք են: 2017-2018 թվականներին պատվաստվածների թիվը կազմել է 1547, իսկ ընթացիկ տարում՝ 7466, ինչը, փորձագետի խոսքով, վկայում է այս պատվաստանյութի հանդեպ բնակչության վստահության բարձրացման մասին:
Հետևեք NEWS.am Medicine-ին Facebook-ում և Twitter-ում