Microsoft ընկերությունը գաղտնի փորձարկումներ է իրականացնում՝ առաջիկայում թողարկման ենթակա նոր սարքի՝ բարձր տեխնոլոգիական վարսակալի արդյունավետությունը ստուգելու համար: Այն արտաքինից ակնհայտորեն Google Glass-ին նմանություն եւ չափազանց թույլ տեսողություն ունեցող կամ կույր մարդկանց շրջապատի մասին ականջակալի միջոցով տեղեկություններ հաղորդելու, ուղղություն ցույց տալու ծրագրավորում ունի:
Սարքը Մեծ Բրիտանիայում գտնվող Ռիդինգ քաղաքի ութ կույր բնակիչների վրա է փորձարկվել, որոնք բնակավայրի մետրոյի կայարաններով ազատ շրջելու հնարավորություն են ստացել, հաղորդում է Daily Mail-ը:
Առայժմ սարքի տվյալների բազան այնքան էլ մեծ չէ, սակայն հաջողությամբ փորձարկվելու դեպքում բազմաթիվ քաղաքներում գործող հանրային տրանսպորտի եւ հաստատությունների՝ ռեստորանների եւ թանգարանների վերաբերյալ տեղեկություններ կավելացվեն:
Չնայած Google Glass-ը դժգոհությունների մեծ ալիք է բարձրացրել հանրության շրջանում՝ սարքի վրա տեղակայված՝ ուշադրությունը շեղող տեսախցիկների պատճառով, ինչը, մասնավորապես, վարորդների պարագայում վտանգավոր հետեւանքներով է հղի, փորձագետները չեն կարծում, որ Microsoft-ի նորարարությունը եւս կարող է նման ճակատագրի արժանանալ, քանի որ վարսակալի օգտատերերն ուշադրություն շեղելու կարիք չեն ունենա:
Տեխնոլոգիական հսկայի կարճաժամկետ տեսլականը նոր տեխնոլոգիաների օգնությամբ թույլ տեսողություն ունեցող կամ կույր մարդկանց համար քաղաքային բնակավայրն առավել համարավետ դարձնելու նպատակ է հետապնդում: Իսկ երկարաժամկետ պլանները քաղաքային հաղորդակցության ոլորտի հեղափոխական փոփոխություններով են բնութագրվում:
Հետևեք NEWS.am Medicine-ին Facebook-ում և Twitter-ում