Կորոնավիրուսային ինֆեկցիայով որոշ պացիենտների մոտ կարող են դրսեւորվել քիչ ուսումնասիրված բարդություններ, այդ թվում՝ նյարդաբանական խանգարումներ, ինչպես վարակված լինելու շրջանում, այնպես էլ ապաքինվելուց հետո: Այս մասին հայտնել է նյարդաբան Նեոնիլա Ֆոմինա-Չերտոուսովան (Ռուսաստան), փոխանցում է «Ռոսիյսկայա գազետան»:
COVID-19-ի դեպքում կարող են առաջանալ նաեւ կենտրոնական նյարդային համակարգի հետ կապված խնդիրներ: Ավելին՝ կորոնավիրուսով վարակվելու դեպքում կաթվածի զարգացման հավանականությունը մեծանում է շուրջ 6 տոկոսով:
«Այն կարող է պատահել կա՛մ կովիդով վարակվելուց հետո 1-3 շաբաթ անց, կա՛մ դառնալ ինֆեկցիոն հիվանդության առաջին ախտանիշը»,- ասել է մասնագետը:
Խոսելով կորոնավիրուսի պատճառով դեմենցիայի արագ զարգացման մասին, մասնագետը նշել է, որ քրոնիկական անոթային խանգարումները կարող են ուղեկցվել նաեւ գրգռվածությամբ, գիտակցության կորստով ջղակծկումներով կամ հակառակը՝ քնկոտությամբ եւ ապատիայով: Սա տեղի է ունենում այն պատճառով, որ ուղեղը չի ստանում թթվածնի անհրաժեշտ ծավալ:
Նյարդաբանը նաեւ նշել է, որ ռիսկի խմբում են, այդ թվում, նաեւ երիտասարդ պացիենտները, որոնց մոտ ինֆեկցիան կարող է ընթանալ առանց թոքաբորբի, եւ որոնք կարող են անգամ չկռահել, որ իրենք հիվանդ են:
«Իսկ հետո կարող են ընդարմանալ նրանց ձեռքերի դաստակները եւ ոտնաթաթերը»,- պարզաբանել է մասնագետը:
Հետևեք NEWS.am Medicine-ին Facebook-ում և Twitter-ում