Շվեդիայի գիտնականները մշակել են ամենավաղ փուլերում Ալցհեյմերի հիվանդության ախտորոշման պարզ եւ հուսալի մեթոդ, որը կարող է նպաստել հիվանդության առավել արդյունավետ վերահսկմանը: Նրանց մոտեցումը ներառում է արյան անալիզ եւ երեք ճանաչողական թեստ, որոնց կատարումը տեւում է ընդամենը 10 րոպե: Նոր մեթոդի ճշգրտությունը 90% է:
Ուսումնասիրությանը, որի արդյունքները հրապարակվել են Nature Medicine ամսագրում, մասնակցել է հիշողության թեթեւ խանգարումներով 340 պացիենտ՝ Շվեդիայից եւ 543 պացիենտ՝ Հյուսիսային Ամերիկայից: Մասնագետները գնահատել են Ալցհեյմերի հիվանդության այդպիսի բիոմարկերների մակարդակը, ինչպիսիք են արյան պլազմայում ֆոսֆորացված տաու-սպիտակուցը, Aβ42 (42 ամինաթթուների շղթայում) եւ Aβ40 (40 ամինաթթուներ) բետա-ամիլոիդների երկու ձեւերի հարաբերակցությունը, Ալցհեյմերի հիվանդության հետ կապված APOE գենի տարբերակը։
Պլազմայում տաու-սպիտակուցի հայտնաբերումը 83% ճշգրտությամբ կանխատեսել է Ալցհեյմերի հիվանդության սկզբնական փուլը հաջորդ 4 տարիների ընթացքում: APOE անալիզի հետ զուգորդմամբ ճանաչողական թեստի պատասխանները արդյունքների ճշգրտությունը բարձրացրել են մինչեւ 90%:
Մասնագետների կարծիքով, հիվանդության վաղ հայտնաբերումը հնարավորություն կտա ավելի արդյունավետորեն դանդաղեցնել դրա զարգացումը:
Հետևեք NEWS.am Medicine-ին Facebook-ում և Twitter-ում