Որոշ մթերքներ կարող են օգնել հոգնածության եւ սթրեսի դեմ պայքարում, հավաստիացնում է բժիշկ-սննդաբան Շիվանի Սիքրին (Հնդկաստան)։
Ինչպես տեղեկացնում է Bangalore Mirror-ը, մասնագետն առաջին հերթին խորհուրդ է տալիս լրացնել C վիտամինի պակասը, որն օրգանիզմին առույգություն է հաղորդում եւ ամրացնում իմունիտետը։ Դրա համար կարելի է կերակրացանկում ներառել կիվի, ցիտրուսայիններ, սպանախ եւ տաքդեղ։
Մասնագետի խոսքով՝ կարող է ուժ հաղորդել նաեւ սպիտակուցը, որը շատ է, օրինակ, ձվի եւ ոսպի մեջ։ Հոգնության պատճառ, հավաստիացնում է Սիքրին, կարող է լինել երկաթի պակասը, որով հարուստ են ոլոռը, տոֆուն, քինոան, չրերը եւ սեւ շոկոլադը, կամ էլ սելենի անբավարարությունը, որի պաշարները կարելի է լրացնել ձվի, լոբազգիների եւ ընկույզների օգնությամբ։
Սիքրին նաեւ խորհուրդ է տալիս կանոնավորապես խմել կաթ շաֆրանով, որն ունի հակաընկճախտային էֆեկտ եւ վերացնում է հոգնածությունը։ Մասնագետի կարծիքով՝ օրն ավելի լավ է սկսել կիտրոնի եւ կոճապղպեղի առույգացնող ըմպելիքով եւ նախաճաշին ուտել երկու հատ կիվի։
Սիքրին նաեւ խորհուրդ է տվել օգտագործել մեղր եւ բանան սթրեսակայունությունը բարձրացնելու համար։ Գերհոգնածության դեպքում, մասնագետի խոսքով, կարելի է ուտել բրազիլական ընկույզ կամ մի երկու կտոր սեւ շոկոլադ, որի մեջ պարունակվում է 70 տոկոսի չափ կակաո։ Սակայն դիաբետիկներին խորհուրդ է տրվում քաղցրին զգուշությամբ վերաբերվել։
Հետևեք NEWS.am Medicine-ին Facebook-ում և Twitter-ում