ՀՀ առողջապահության նախարար Արմեն Մուրադյանը դպրոցում սիրում էր պատմություն եւ աշխարհագրություն, իսկ լեզուները նրան այնքան էլ հեշտ չէին տրվում: Այս մասին նա խոստովանեց լրագրողների հետ զրույցում՝ Ալեքսանդր Պուշկինի անվան թիվ 8 դպրոց կատարած իր այցի ժամանակ:
Արմեն Մուրադյանը պատմեց նաեւ այն մասին, որ սիրում էր բոլոր այն առարկաները, որոնք կապված էին նրա ապագա մասնագիտության հետ:
Հիշեցնենք, որ այսօր՝ սեպտեմբերի մեկին, Հայաստանում նշվում է կրթության եւ դպրության օրը, ինչի կապակցությամբ պաշտոնատար անձինք այցելում են իրենց նախկին դպրոցները՝ ողջունելու առաջին դասարանցիներին եւ շրջանավարտներին: Առողջապահության նախարար Արմեն Մուրադյանը այցելել էր թիվ 8 դպրոցը, որտեղ եւ սովորել էր տարիներ առաջ:
Իր իսկ փոխանցմամբ, սեպտեմբերի մեկին նվիրված արարողությունը հիշեցրեց նրան իր առաջին ուսուցչուհի Մարգարիտա Աբրահամովնային եւ իր սեպտեմբերի մեկը՝ 36 տարի առաջ, ինչպես նաեւ արթնացրեց դպրոցի հետ կապված բոլոր մանկական հիշողությունները:
«Շատ ոգեվորիչ օր էր, շատ հուզումնալից: Ցանկանում եմ, որ մեր ապագա սերունդը, որը այսօր հատեց իր առաջին ուսումնական հաստատության շեմը, առողջ լինի եւ, անշուշտ, գիտելիքներով օժտված», - նշեց նախարարը:
Հետևեք NEWS.am Medicine-ին Facebook-ում և Twitter-ում