Ալկոհոլն ավելի վնասակար է լյարդի համար շաքարախտի և հիպերտոնիայի դեպքում. CGH

Շաքարային դիաբետի, հիպերտոնիայի կամ որովայնի ավելորդ ճարպի դեպքում ալկոհոլային ճարպային լյարդի հիվանդության զարգացման ռիսկը կրկնապատկվում է։ Այս եզրակացությանն են հանգել Հարավային Կալիֆոռնիայի համալսարանի գիտնականները։ Հետազոտության արդյունքները հրապարակվել են «Կլինիկական գաստրոէնտերոլոգիա և հեպատոլոգիա» (CGH) ամսագրում։

Ուսումնասիրությանը մասնակցել է մոտ 40 հազար մարդ։ Նրանք պատմել են, թե որքան հաճախ և ինչ քանակությամբ են օգտագործում ալկոհոլային խմիչքներ։ Բոլոր կամավորները նաև հասանելիություն են տրամադրել իրենց բժշկական գրառումներին, իսկ որոշները հայտնել են, որ ունեն քրոնիկ հիվանդություններ։

Արդյունքները ցույց են տվել, որ բարձր արյան ճնշում, շաքարախտ կամ որովայնի ճարպակալում ունեցող մարդկանց մոտ ալկոհոլի չարաշահումը կրկնապատկում է լյարդի ճարպային հիվանդության զարգացման ռիսկը։ Գիտնականները բացատրել են, որ լյարդում ավելորդ ճարպի կուտակումը կարող է հանգեցնել բորբոքման և սպիների առաջացման, որոնք սահմանափակում են օրգանի գործառույթը։ Չբուժվելու դեպքում, նորմալ օրգանների հյուսվածքը կշարունակի փոխարինվել շարակցական հյուսվածքով։ Այս պաթոլոգիան հայտնի է որպես ցիռոզ։

Հետազոտողները նշում են, որ որովայնի ճարպը, արյան մեջ շաքարի ավելցուկը և հիպերտոնիան ուժեղացնում են ալկոհոլի վնասակար ազդեցությունը՝ արագացնելով ճարպի կուտակումը լյարդի բջիջներում։ Գիտնականները կարծում են, որ նման վտանգավոր ազդեցություն է առաջանում կանանց համար օրական երկու բաժին և տղամարդկանց համար չորս բաժին ալկոհոլի օգտագործման դեպքում։

Միացյալ Նահանգներում մեկ բաժակ ալկոհոլը հավասար է 14 գրամ էթանոլի։ Այս քանակը պարունակվում է երկու բաժակ գինու, 250-350 մլ գարեջրի կամ մեկ բաժակ թունդ խմիչքի մեջ։

Հետևեք NEWS.am Medicine-ին Facebook-ում և Twitter-ում