Թուրքական հեռուստատեսային շոուներից մեկին հաճախակի հյուրընկալվող բժիշկն ուղիղ եթերում՝ միլիոնավոր հեռուստադիտողների աչքի առաջ, սրտի կրկնվող նոպա է տարել, հաղորդում է FoxNews-ը:
Saglikli Yasa՝ «առողջ ապրելակերպ» հաղորդման վարողը մանկական հարթաթության վերաբերյալ զրույց էր վարում մոտ 50-ամյա բժշկի՝ դոկտոր Ուգուր Յանսելի հետ, երբ վերջինս մի ակնթարթում ցնցվել է եւ կրծքավանդակը բռնել: Վայրկյաններ անց, հաղորդավարի խորհրդով մի փոքր ջուր խմելուց հետո, շոուին հյուրընկալված մասնագետը երկրորդ նոպան է տարել:
Ի պատասխան հաղորդավարի հարցի, թե ինչպես կարող է օգնել, դոկտոր Յանսելը պատասխանել է, թե «սրտի խթանիչի հետ ինչ-որ բան այն չէ»:
Նախքան գովազդային ընդմիջում հայտարարելը, հաղորդավարը, ով ողջ ընթացքում հանգստություն էր պահպանում, նշել է. «Հիմա էլ թույլ տվեք մեր բժշկի խնամքով զբաղվել. գովազդ մեր եթերում»:
The Mirror պարբերականի հաղորդմամբ, դոկտոր Յանսելը հիվանդանոց է տեղափոխվել, որտեղ եւս մեկ նոպա է տարել, սակայն այժմ արդեն, համաձայն տեղեկությունների, կայուն վիճակում է գտնվում:
Հետևեք NEWS.am Medicine-ին Facebook-ում և Twitter-ում