Սննդային հավելումները կարող են մեծացնել սրտի հիվանդությունների վտանգը. European Heart Journal

European Heart Journal բժշկագիտական հանդեսում հրապարակված հետազոտության արդյունքները ցույց են տալիս, որ տարածված սննդային կոնսերվանտներ պարունակող մթերքների կանոնավոր օգտագործումը կարող է հիպերտոնիայի և սիրտ-անոթային հիվանդությունների առաջացման բարձր ռիսկի պատճառ դառնալ:

Գիտնականները նշում են, որ խոսքը վերաբերում է ոչ թե առանձին մթերքներին, այլ այն հավելումների համակցված ազդեցությանը, որոնք մեծ քանակությամբ օգտագործվում են արդյունաբերական եղանակով վերամշակված սննդի մեջ:

Հետազոտությանը մասնակցել է ավելի քան 112 հազար կամավոր Ֆրանսիայից՝ NutriNet-Santéխոշոր նախագծի շրջանակում: Մասնակիցները յուրաքանչյուր վեց ամիսը մեկ մանրամասնորեն արձանագրել են իրենց սննդակարգը, ինչից հետո նրանց առողջական վիճակին հետևել են միջինում 7–8 տարի։ Այդ ընթացքում հետազոտողները վերլուծել են տարբեր սննդային հավելումների օգտագործման և հիպերտոնիայի, ինֆարկտի, ուղողի կաթվածի ու սիրտ-անոթային այլ հիվանդությունների զարգացման միջև եղած կապը:

Արդյունքները ցույց են տվել, որ գրեթե բոլոր մասնակիցները (մոտ 99,5%-ը) դիտարկման առաջին տարիներին օգտագործել են առնվազն մեկ կոնսերվանտ: Ընդ որում, այն մարդիկ, ովքեր օգտագործել են ամենամեծ քանակությամբ «ոչ հակաօքսիդանտային» կոնսերվանտներ, դրանք ամենաքիչն են օգտագործողների համեմատ ունեցել են հիպերտոնիայի զարգացման մոտ 29%-ով և սիրտ-անոթային հիվանդությունների՝ 16%-ով ավելի բարձր ռիսկ:

Հետազոտողներն առանձնացրել են առավել հաճախ օգտագործվող մի շարք հավելումներ, որոնք կապ են ցուցաբերել բարձր ճնշման և/կամ սիրտ-անոթային ռիսկերի հետ: Դրանց թվում են՝ կալիումի սորբատը (E202), կալիումի մետաբիսուլֆիտը (E224), նատրիումի նիտրիտը (E250), ասկորբինաթթուն (E300), նատրիումի ասկորբատը (E301), նատրիումի էրիտորբատը (E316), կիտրոնաթթուն (E330) և հազրեվարդի (ռոզմարին) էքստրակտները (E392):

Հեղինակներն ընդգծում են, որ հետազոտությունը դիտողական բնույթ ունի և չի ապացուցում ուղղակի պատճառահետևանքային կապը: Սակայն տվյալները համահունչ են փորձարարական աշխատանքներին, որտեղ ենթադրվում է, որ որոշ կոնսերվանտներ կարող են առաջացնել օքսիդատիվ սթրես և ազդել օրգանիզմում նյութափոխանակության գործընթացների վրա:

Հետևեք NEWS.am Medicine-ին Facebook-ում և Twitter-ում