Ընդհանուր անզգայացմամբ պակաս ինվազիվ գինեկոլոգիական վիրահատությունների ժամանակ աղմուկը չեզոքացնող ականջակալների կիրառումը կարող է 32%-ով նվազեցնել հետվիրահատական սրտխառնոցի և փսխման ռիսկը: Նման եզրակացության են եկել ռանդոմիզացված կլինիկական հետազոտության հեղինակները, որոնց արդյունքները ներկայացվել են Anesthesiology 2026 ամենամյա համաժողովում, հայտնում է Medical Xpress-ը:
Հետազոտությանը մասնակցել է 18-ից 65 տարեկան 192 պացիենտ: Նրանց կեսը նարկոզի մեջ մտնելու պահից մինչև վիրահատության ավարտը կրել է աղմուկը չեզոքացնող սովորական լիաչափ ականջակալներ: Մյուս մասնակիցները վիրահատվել են առանց ականջակալների: Բոլոր պացիենտները ստացել են նույն անզգայացումը և սրտխառնոցի ու փսխման կանխարգելման ստանդարտ դեղամիջոցներ:
Վիրահատությունից հետո 48 ժամվա ընթացքում սրտխառնոց կամ փսխում առաջացել է ականջակալներ կրող պացիենտների 35,4%-ի և ստուգիչ խմբի մասնակիցների 52,1%-ի մոտ: Այդպիսով, այս բարդությունների ռիսկը եղել է մոտ 32%-ով ավելի ցածր: 100 պացիենտի հաշվարկով, ականջակալների օգտագործումը թույլ է տվել խուսափել հետվիրահատական սրտխառնոցի և փսխման շուրջ 17 դեպքից: Բացի այդ, վիրահատությունից հետո առաջին 24 ժամվա ընթացքում ականջակալներով պացիենտների մոտ ախտանիշներն ավելի թույլ են արտահայտված եղել: Այս խմբում անցանկալի երևույթների քանակի աճ չի արձանագրվել:
Հետվիրահատական սրտխառնոցն ու փսխումը վիրաբուժական միջամտության և անզգայացման առավել տարածված տհաճ հետևանքներից են: Դրանք կարող են հանգեցնել ջրազրկման, դանդաղեցնել ապաքինումը, պահանջել լրացուցիչ դեղորայք և երկարացնել հետվիրահատական հիվանդասենյակում գտնվելու ժամանակը: Հայտնի է, որ նման բարդությունների ռիսկը մեծացնում են անզգայացնող և ցավազրկող դեղամիջոցները: Սակայն հետազոտողները ենթադրում են, որ որոշակի դեր կարող է ունենալ նաև վիրահատարանի աղմուկը:
Հետազոտության ընթացքում վիրահատարաններում աղմուկի միջին մակարդակը կազմել է մոտ 66 դեցիբել՝ մոտավորապես սովորական խոսակցության և մոտակայքում աշխատող փոշեկուլի ձայնի սահմաններում: Ընդ որում, այն մեխանիզմները, որոնց միջոցով ձայները կարող են ազդել նարկոզի տակ գտնվող պացիենտի օրգանիզմի վրա, դեռևս բավարար չափով ուսումնասիրված չեն:
Հետևեք NEWS.am Medicine-ին Facebook-ում և Twitter-ում