Երկրորդ տիպի շաքարային դիաբետի դեմ պայքարելու համար օգտագործվող դեղորայքը ակտիվացնում է գլխուղեղի այն ռեցեպտորները, որոնք պատասխանատու են քաղցի զգացողության համար, ինչի արդյունքում դիաբետով տառապող մարդիկ ավելի շատ են քաղց զգում եւ, որպես հետեւանք, ավելի շատ են սնվում, ինչն էլ հանգեցնում է ավելորդ քաշի գոյացմանը, հայտնում են Ջորջիայի համալսարանի գիտնականները:
Նրանց խոսքով՝ այս հանգամանքն է երկրորդ տիպի դիաբետի բուժման համար նախատեսված դեղամիջոցներ (օրինակ, տիազոլիդինդիոններ) ընդունող մարդկանց մոտ ավելորդ քաշի գոյացման պատճառը: Տիազոլիդինդիոնները նպաստում են արյան մեջ շաքարի պարունակության մակարդակի նվազեցմանը եւ օրգանիզմի հյուսվածքները ավելի զգայուն են դարձնում ինսուլինի նկատմամբ:
Վերոնշյալ համալսարանի գիտնականները կրծողների վրա փորձարկումներ են անցկացրել եւ քաղցն ակտիվացնող բջիջների վրա սենսորներ են գտել (PPAR&Upsih): Հիպոտալամուսում գտնվող այս բջիջները հայտնի են որպես ագուտիանման սպիտակուցներ: Այսինքն, ինչպես պարզվեց, գլյուկոզայի մետաբոլիզմին մասնակցող ռեցեպտորները գտնվում են սննդակարգային վարքագիծը վերահսկող բջիջներում:
Այս ռեցեպտորների ակտիվացումը ստիպում էր կրծողներին ավելի շատ ուտել եւ ավելի շատ սնունդ տնտեսել: Ռեցեպտորների աշխատանքի կասեցումից հետո կենդանիները ավելի քիչ էին ուտում եւ ավելի քիչ էին սնունդ տնտեսում նույնիսկ այն ժամանակ, երբ երկար ժամանակով զրկվում էին սնունդից եւ քաղցած էին:
Հետևեք NEWS.am Medicine-ին Facebook-ում և Twitter-ում