Էրիտրոմիցին հակաբիոտիկի ընդունումը հղիության ընթացքում վտանգավոր է դեռեւս չծնված երեխաների համար, նշում են բրիտանացի գիտնականները: Այս դեղամիջոցը ավելացնում է փոքրիկների մոտ մանկական ուղեղային կաթվածի եւ էպիլեպսիայի զարգացման հավանականությունը:
Great Ormond Street Hospital եւ University College London-ի գիտնականները կապ են հայտաբերել տարածված հակաբիոտիկի, էպիլեպսիայի եւ մանկական ուղեղային կաթվածի միջեւ: Հետազոտության ընթացքում գիտնականները հետեւել են 200 հազար բրիտանացի կանանցից ծնված երեխաների առողջությանը:
Ընդհանուր առմամբ, հղիության ընթացքում հակաբիոտիկներ ընդունած մայրերի երեխաները ավելի են հակված էպիլեպսիային եւ մանկական ուղեղային կաթվածին: Սակայն մակրոլիդների դասի հակաբիոտիկներ (էրիթրոմիցին եւ այլն) ընդունած, կանանց երեխաները երկու անգամ ավելի հաճախ էին վերոնշյալ հիվանդություններից մեկով տառապում ՝ այն երեխաների համեմատ, որոնց մայրերը պենիցիլին են ընդունել:
PLOS ONE ամսագրում լույս տեսած հետազոտությունը ցույց է տվել, որ ապագա մայրերի մեկ երրորդը հակաբիոտիկներ է ընդունում հղիության ընթացքում, եւ առավել հաճախ օգտագործվող հակաբիոտիկը պենիցիլինն է: Հղի կանանց 7 տոկոսը մակրոլիդների խմբի հակաբիոտիկներ է ընդունել: Նշենք, որ հակաբիոտիկների այս տեսակը առավել հաճախ օգտագործվում է միզասեռական ուղիների եւ շնչուղիների ինֆեկցիաների բուժման համար: Մակրոլիդներ ընդունած 150 մայրերից բաղկացած խմբում մանկական ուղեղային կաթվածով մեկ երեխա ավել էր ծնվում՝ պենիցիլին ընդունած կանանց խմբի համեմատ:
Հետևեք NEWS.am Medicine-ին Facebook-ում և Twitter-ում