Բորելիդին կոչվող մոլեկուլը կարող է օգնել օրգանիզմին սնկային եւ բակտերիալ հիվանդությունների, մալարիայի, ինչպես նաեւ չարորակ ուռուցքների դեմ պայքարում, ինչպիսին են լեյկեմիան եւ քաղցկեղի մի շարք այլ տեսակներ: Համապատասխան հոդվածը լույս է տեսել Nature Communications ամսագրում:
Բորելիդինն արդեն երկու հազար տարի առաջ օգտագործվել է մալարիայի բուժման համար, իսկ համանման կառուցվածք ունեցող նյութերն օգտագործվում են բակտերիալ հիվանդությունների դեմ պայքարում: Գիտնականները պարզել են, որ մոլեկուլը ի զորու է արդյունավետ պայքարել սնկային հիվանդությունների եւ մի շարք չարորակ ուռուցքների դեմ, սակայն նրա ազդեցության մեխանիզմը մինչ օրս հասկանալի չէր:
Չին հետազոտողները Սյու Յուի եւ Պենֆեյ Ֆանի գլխավորությամբ պարզել են, ինչպես է բորելիդինը հաղթահարում այդ հիվանդությունները: Մոլեկուլը դանդաղեցնում է ամինոացիլ ՌՆԹ սինթետազայի աշխատանքը՝ վերջինս հանդիսանում է ամինաթթուների եւ ՌՆԹ մոլեկուլների միջեւ կապի համար պատասխանատու ռեակցիաներն արագացնող ֆերմենտ: Այնուհետեւ բորելիդինի մոլեկուլը պարզապես զբաղեցնում է բոլոր այն մոլեկուլների տեղերը, որոնց ամրացել են օրգանիզմի համար վնասակար կամ մուտացիայի ենթարկված գոյացությունները: Գիտնականները համոզված են, որ նրանց բացահայտումը բորելիդինի սկզբունքով գործող դեղամիջոցների մշակման ոլորտում մեծ առաջընթաց է:
Հետևեք NEWS.am Medicine-ին Facebook-ում և Twitter-ում