Տազ Ջոնսը՝ 5-ամյա Մալիայի մայրը, արել է այս լուսանկարը, երբ նրա դուստրը եւ Մադելինա Դելուկը Փիթսբուրգի մանկական հիվանդանոցում քիմիաթերապիայի կուրսեր էին անցնում: Այս լուսանկարը, հայտնվելով համացանցում, գրավեց հանրության ուշադրությունը, եւ հազարավոր մարդիկ սկսեցին աղջիկներին շուտափույթ ապաքինում ցանկանալ:
Տազի խոսքով՝ իր դուստրն ու Մադելինան ծանոթացան նույն այն օրը, երբ արվել է այս լուսանկարը: Երբ նրանք, գրկախառնված, նայում էին պատուհանից, կինը չդիմացավ եւ նկարեց նրանց:
Մալիայի մոտ դեռեւս երեք տարի առաջ նեյրոբլաստոմա հայտնաբերվեց՝ այն բանից հետո, երբ բժիշկները նրա որովայնում ուռուցք գտան: Իսկ Մադելինան երեք տարի շարունակ պայքարում է միելոիդ լեյկեմիայի դեմ եւ վերջերս է ավարտել քիմիաթերապիայի կուրսը: Մալիային շուտով կտեղափոխեն այլ կլինիկա՝ հետագա բուժման համար:
«Ես իսկապես ցանկանում էի, որ ամբողջ աշխարհը տեսնի այս նկարը, քանի որ այն ցուցադրում է միանգամից մի քանի երեւույթ՝ ընկերություն, հիվանդություն, սեր ու աջակցություն: Ես ցանկանում եմ, որ մարդիկ զգան այն, ինչ զգացի ես այդ պահին», - գրել է Տազը իր ֆեյսբուքյան էջում:
Հետևեք NEWS.am Medicine-ին Facebook-ում և Twitter-ում