Կանանց շրջանում բիսեքսուալ կողմնորոշումը կրկնակի հաճախ է հանդիպում, քան տղամարդկանց շրջանում: Այս մասին են վկայում Մեծ Բրիտանիայում անցկացված հետազոտության արդյունքները:
Ըստ հետազոտության հեղինակների՝ բրիտանացիների 93 տոկոսը իրեն հեթերոսեքսուալ է համարում, 1.1 տոկոսը՝ հոմոսեքսուալ, ու 0.5 տոկոսը՝ բիսեքսուալ: Սակայն ուշագրավ է, որ հարցման մասնակիցների պատասխանները մեծամասամբ պայմանավորված էին նրանց տարիքով ու սեռով: Օրինակ երիտասարդներն ավելի հազվադեպ են իրենց հեթերոսեքսուալ համարում, քան տարեցները: 16-24 տարեկան երիտասարդների 2.6 տոկոսը ասում էին, որ իրենք գեյեր են, լեսբուհիներ, կամ բիսեքսուալներ, իսկ 65- անց մարդկանց ընդամենը 0.6 տոկոսն էր խոստովանում դա: Ավելին, իրեն բիսեքսուալ էր համարում հարցման մասնակցած կանանց 0.7 տոկոսը ու տղամարդկանց միայն 0.3 տոկոսը: Իսկ ահա միանշանակ հոմոսեքսուալ կողմնորոշման հարցում պատկերը մի փոքր այլ է: Տղամարդկանց 1.5 տոկոսն է ասում, որ իրենք գեյ են, իսկ կանանց ընդամենը 0.7 տոկոսն է իրեն լեսբուհի անվանում:
Հետազոտությունը նաեւ ցույց է տվել, որ բիսեքսուալների ու հոմոսեքսուալների թիվն ավելի մեծ է պրոֆեսիոնալ գործունեությամբ կամ մենեջմենթով զբաղվողների, քան ֆիզիկական աշխատանք կատարողների շրջանում:
Հետևեք NEWS.am Medicine-ին Facebook-ում և Twitter-ում