Աղտոտված օդի մշտական ազդեցությունը կարող է հանգեցնել ուղեղի փորոքների լայնացման, ցույց են տվել մկների վրա կատարված փորձերը: Իսկ դա նյարդային համակարգի խախտումների, մասնավորապես, շիզոֆրենիայի եւ աուտիզմի առանձնահատկություններից մեկն է: Հետազոտության արդյունքները Չիկագոյում տեղի ունեցած ամենամյա հանդիպման ժամանակ ներկայացրել են Գիտության զարգացման ամերիկյան ասոցիացիայի (AAAS) հետազոտողները:
Փորձագիտական հանձնաժողովի կազմակերպիչ բժիշկ Դեբորա Քորի-Սլեխտայի խոսքով՝ օդի աղտոտվածությունը տարբեր մետաղների եւ գազերի խառնուրդ է, որը հաճախ կազմված է լինում տարբեր չափերի բազմաթիվ տարրերից: Առավել մեծ տարրերը, որպես կանոն, վտանգավոր չեն օրգանիզմի համար, քանի որ դրանք դուրս են գալիս հազի հետ, իսկ ամենափոքրները, մասնագետների խոսքով, ավելի մեծ վտանգ են ներկայացնում:
«Բանն այն է, որ դրանք ներթափանցում են թոքեր, այնտեղից էլ ընկնում արյան մեջ»,- FoxNews.com-ին տված հարցազրույցում ասել է Քորի-Սլեխտան, ով դասավանդում է Ռոչեսթերի համալսարանի բժշկական դպրոցի էկոլոգիայի ֆակուլտետում:
Նա ասել է, որ աղտոտվածության խնդրին պատահաբար բախվել է այն բանից հետո, երբ գործընկերները նրան աղտոտված օդի ազդեցությանը ենթարկված մկների ուղեղներ են ուղարկել:
Հետազոտողները պարզել են, որ դրանք բոլորը որեւէ կերպ վնասված են եղել, բայց ամենաշատը՝ գլխուղեղի կողային փորոքները: Սովորաբար այդ փորոքների վնասվելու դեպքում կենտրոնական նյարդային համակարգն ամբողջությամբ չի զարգանում:
Փորոքային մեգալիան՝ փորոքների լայնացումը, եւս կապված է ուղեղի մի շարք հիվանդությունների հետ, ինչպիսիք են՝ երկբեւեռ խանգարումը եւ Ալցհեյմերի հիվանդությունը, ինչպես նաեւ երեխաների մի շարք ի ծնե թերությունների հետ: Քորի-Սլեխտան նշել է, որ այդ վնասվածքները եղել են հիմնականում կրծողների արուների դեպքում, սա հատկապես հետաքրքիր բացահայտում է՝ հաշվի առնելով, որ եւ՛ աուտիզմով, եւ՛ շիզոֆրենիայով հիմնականում տղամարդիկ են տառապում:
Հետևեք NEWS.am Medicine-ին Facebook-ում և Twitter-ում