Քաղցրեղենը կարող է օգնել հաջողությամբ պայքարել ավելորդ քաշի դեմ, հայտնել են Հոլանդիայի Թիլբուրգի համալսարանի եւ Լիսաբոնում Պորտուգալիայի Կաթոլիկական համալսարանի հետազոտողները: Սակայն գիտնականների կարծիքով դա կարող է տեղի ունենալ այն պայմանով, եթե քաղցրեղեն ուտելը նախապես պլանավորված լինի:
«Սննդակարգից պլանավորված շեղումները կարող են մարդուն հուզական խթան տալ եւ մեծացնել մոտիվացիան, որն օգնում է մեծ հավանականությամբ երկարաժամկետ հեռանկարում սննդակարգի հետեւել», - հաղորդել են հետազոտողները:
Գիտնականները հետեւել են քաշի խնդիր ունեցող 36 տղամարդու եւ կնոջ: Արդյունքում բժիշկներն այն եզրակացության են հանգել, որ այն մասնակիցները, որոնք առաջնորդվել են իրենց նշանակված սննդակարգով, որը շաբաթը մեկ ներողամտորեն թույլ էր տալիս քաղցրեղեն ուտել, ավելի կարգապահորեն են հետեւել նիհարելու պլանին: Մասնավորապես, այդ մարդիկ նիհարելու ավելի մեծ մոտիվացիա ունեին եւ առանձնանում էին ավելի կայուն հուզական վիճակով այն խմբի համեմատ, որի անդամները պիտի խստորեն, առանց որեւէ շեղման հետեւեին սննդակարգին:
Գիտնականներն առաջին անգամ չէ, որ թույլ են տալիս քաղցրեղեն ներառել ավելորդ քաշից ազատվել ցանկացող մարդկանց սննդակարգում: Կան հետազոտության տվյալներ, որոնք ցույց են տալիս, որ քաղցրեղենից հրաժարումը նույնիսկ խանգարում է նիհարելու գործընթացին. 65 տոկոսը նրանց, ովքեր հանուն սլացիկ կազմվածքի լիովին հրաժարվում էին շոկոլադից եւ խմորներից, հետագայում դարձյալ գիրանում էին:
Հետևեք NEWS.am Medicine-ին Facebook-ում և Twitter-ում