Իրաքը հետաքրքրված է Հայաստանի առողջապահական համակարգի ձեռքբերումներով։ Այսպես, իրաքյան կողմին հետաքրքրել են մեր երկրում մանկական սրտային վիրաբուժության, մասնավորապես` իրաքցի հիվանդ երեխաների բուժումը Հայաստանում իրականացնելու հնարավորությունները։
Ինչպես հայտնում է ՀՀ Առողջապահության նախարարության մամուլի ծառայությունը, Բաղդադում տեղի ունեցած հայ-իրաքյան միջկառավարական հանձնաժողովի նիստում քննարկվել են նաեւ առողջապահության ոլորտին առնչվող հարցեր։ Հանձնաժողովում ներկայացված ՀՀ առողջապահության նախարարի տեղակալ Սերգեյ Խաչատրյանը մասնակցել է երկու երկրի առողջապահական համակարգերի համագործակցության խթանմանն ուղղված քննարկումներին։
Օնկովիրաբուժության ոլորտում Իրաքի առողջապահության համակարգի ղեկավարները հետաքրքրված են իրենց մասնագետների վերապատրաստման, բժիշկների եւ բուժքույրերի գործնական ունակությունների ու հմտությունների բարելավմանն ուղղված դասընթացների կազմակերպումով` ինչպես Իրաքում, այնպես էլ` Հայաստանում։
Ստորագրված արձանագրությունում ներառվել են նաեւ դեղերի շրջանառությանը, վարակիչ եւ ոչ վարակիչ հիվանդությունների վերահսկմանը վերաբերող փոխադարձ հետաքրքրություն ներկայացնող հարցեր։
Հետևեք NEWS.am Medicine-ին Facebook-ում և Twitter-ում