Ապրիլին վիրավորված Անդրեյն արդեն քայլում է հենակների օգնությամբ

Քչերն էին հավատում, որ 19-ամյա Անդրեյ Վարդումյանը, որի ողնաշարը քառօրյան պատերազմի ժամանակ ստացած վիրավորումից երկու տեղից վմասվել էր, երբեւէ կկարողանա քայլել, սակայն այսօր նա արդեն քայլում է, ճիշտ է՝ առայժմ հենակների օգնությամբ:

NEWS.am Medicine-ի թղթակցի հետ զրույցում Անդրեյը նշեց, որ դեռ 20 օր էլ կմնա Կարմիր Խաչի վերականգնողական կենտրոնում, սակայն առավելագույնս վերականգնվելու համար անհրաժեշտ է երկու տարի: Որքանով լիարժեք կլինի այդ վերականգնումը՝ ոչ ոք չի կարող ասել, բայց եւ՛ Անդրեյը, եւ՛ նրա հետ աշխատող մասնագետներն անում են ամեն ինչ իրենց ուժերի չափով:

Անդրեյի խոսքով՝ կենտրոնից դուրս գրվելուց հետո չի պատրաստվում սահմանափակվել ձեռք բերածով. եթե մինչ այդ չհասնի իրեն բավարարող արդյունքների, կփնտրի այլ մեթոդներ, որոնց օգնությամբ էլի ավելի կամրապնդվի:

Իր հետագա ծրագրերի մասին խոսելով՝ Անդրեյը նշեց, որ առայժմ ամբողջությամբ կենտրոնացած է բուժման եւ վերականգնման վրա, սակայն ձմռանը կցանկանար վերադառնալ ուսմանը:

Հիշեցնենք, որ ապրիլյան պատերազմի ժամանակ Մարտակերտում 19-ամյա Անդրեյը հրազենային վիրավորում է ստացել՝ նրա ողնաշարը վնասվել էր երկու տեղից: Նրան առաջին օգնություն են ցույց տվել ծառայակիցները, նրանք էլ կանչել են շտապ օգնություն, որը նրան տեղափոխել է Մարտակերտի հոսպիտալ, այնտեղից նրան տեղափոխել են Ստեփանակերտ, այնուհետեւ՝ Երեւան:

Որոշ ժամանակ Անդրեյը բուժում է ստացել «Էրեբունի» բժշկական կենտրոնում, որից հետո նրան տեղափոխել են Կարմիր Խաչի վերականգնողական կենտրոն:

Մասնագետների խոսքով՝ վիրավոր զինծառայողների վերականգնողական բուժման հաջողության մեջ մեծ դերակատարում ունի նրանց տրամադրվածությունը եւ ոգու ուժը. ովքեր տրամադրված են վերականգնման եւ չեն հանձնվում, արագ են ոտքի կանգնում: Մասնագետները Անդրեյին դասում են հենց այն տղաների շարքին, որոնք դրական են տրամադրված. իր տրամադրվածության շնորհիվ նա բավական արագ կարողացավ շարժվել նախ քայլասայլակի օգնությամբ, ապա անցավ հենակներին: Ինքը՝ Անդրեյը հուսով է, որ ապագայում կկարողանա շարժվել ինքնուրույն՝ առանց հենակների:

Հետևեք NEWS.am Medicine-ին Facebook-ում և Twitter-ում