Իտալացիներին, որոնք իրենց երեխաներին բուսակերական սննդակարգ են պարտադրում, կարող է ազատազրկում սպառնալ, եթե նման պատիժ ենթադրող վիճահարույց օրինագիծը ընդունվի երկրի խորհրդարանի կողմից:
Այս փաստաթղթի նախնական տարբերակում պնդվում է, որ նման ծնողներն իրենց երեխաներին սննդակարգ են պարտադրում, որը «զուրկ է առողջ եւ հավասարակշռված աճի համար անհրաժեշտ տարրերից»:
Օրինագիծը մշակվել է «Առաջ, Իտալիա» աջ կենտրոնամետ կուսակցությունից Էլվիրա Սավինոյի կողմից:
Վերջին մեկ ու կես տարվա ընթացքում հիվանդանոց է տեղափոխվել չորս երեխա, որոնք ծնողների շնորհիվ բուսակերական սննդակարգի էին հետեւում:
Միաժամանակ որոշ դիետոլոգներ, օրինակ` Ամերիկյան դիետիկ ասոցիացիայից, պնդում են, որ բուսակերական սննդակարգը համապատասխանում է երեխաներին` պայմանով, որ նրանց ապահովի անհրաժեշտ սննդանյութերի ամբողջ սպեկտրով, մասնավորապես` В12 վիտամինով:
Բժիշկները ենթադրում են, որ որոշ դեպքերում հիվանդանոց տեղափոխված երեխաների համար պատասխանատու մեծահասակները կարող էին չհասկանալ, թե ինչպես է անհրաժեշտ լրացնել սննդակարգը երեխաների համար այն անվտանգ դարձնելու համար:
Էլվիրա Սավինոյի առաջարկած օրինագիծը նախ կքննարկեն խորհրդարանական կոմիտեներում, ինչից հետո այն կներկայացվի ամբողջ պալատին: Դա գուցե տեղի ունենա ավելի ուշ` այս տարվա ընթացքում:
«Եթե նման սննդակարգ է ընտրում հասուն, տեղեկացված մարդը, առարկություն չկա,-ասված է փաստաթղթում: Խնդիրն առաջանում է, երբ խոսքը երեխաների մասին է… Բուսակերական կամ վեգանային սննդակարգի հետեւելիս օրգանիզմում ցինկի, երկաթի, D վիտամինի, B12 վիտամինի եւ օմեգա-3-ի պակաս է առաջանում»:
Օրինագծի` ներկայիս վիճակով ընդունման դեպքում խախտողներին կսպառնա մինչեւ մեկ տարվա ազատազրկում: Այդ ժամկետը կարող է երկարացվել մինչեւ չորս տարի, եթե երեխան հիվանդանա կամ հաշմանդամ դառնա եւ մինչեւ վեց տարի, եթե երեխան մահանա:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր