5 «յուղոտ» մթերք, որոնք կօգնեն նիհարել

Ամենեւին էլ ոչ բոլոր յուղոտ ու կալորիական մթերքներն են վնասակար կազմվածքի համար: Կան նաեւ այնպիսիք, որոնց չափավոր օգտագործումը ոչ միայն ավելորդ քաշի պատճառ չի դառնա, այլ հակառակը` կօգնի նիհարել:

Պանիր

Դուք, հավանաբար, լսել եք, որ պանիրը շատ յուղոտ եւ կալորիական մթերք է: Բայց պանիրը նաեւ մեծ քանակությամբ սպիտակուց է պարունակում, ինչի շնորհիվ այն երկար ժամանակով հագեցնում է քաղցը: Բացի այդ՝ պանիրը հարուստ է հանքանյութերով, հատկապես՝ կալցիումով, որն անհրաժեշտ է ոսկորների եւ ատամների առողջության համար: Որոշ մասնագետներ կարծում են, որ մեկ կտոր պանիրն օրգանիզմին ստիպում է ավելի շատ ճարպեր այրել:

Մակարոնեղեն

Խոշոր աղացած ալյուրից պատրաստված մակարոնային արտադրանքը երկարատեւ հագեցվածություն է ապահովում, որի շնորհիվ կարելի է երկար ժամանակ ձեռքի հետ լրացուցիչ ոչինչ չուտել: Մի քանի հետազոտություններով պարզվել է, որ մակարոն ուտող մարդիկ ավելի են հակված մարմնի զանգվածի նվազմանը եւ կայուն քաշի պահպանմանը, քան նրանք, որոնք ընդհանրապես մակարոնից հրաժարվում են:

Ընկուզեղեն

Ընկուզեղենը հրաշալի մթերք է նույնիսկ նիհարող մարդկանց համար: Չնայած մեծ քանակով ճարպեր են պարունակում, դրանք տվյալ դեպքում օգտակար ճարպեր են: Դրանից բացի, ընկուզեղենը հարուստ է սպիտակուցներով եւ բջջանյութով, որոնք օգնում են արյան մեջ գլյուկոզայի մակարդակի կայունացմանը եւ այդպիսով պաշտպանում են ախորժակի «գրգռումներից»: Սակայն հարկ է հիշել, որ պետք է ուտել ոչ թե բոված, այլ հում ընկուզեղեն, եւ չարժի չափից շատ ուտել:

Սթեյք

Տավարի անյուղ մսից ոչ մեծ չափի սթեյկը պարունակում է գրեթե նույնքան կալորիա, որքան հավի կրծքամիսը: Սթեյկը հարուստ է սպիտակուցով եւ կօգնի ավելի երկար կուշտ մնալուն: Այս պատճառով նույնիսկ նիհարողներին չարժի սննդակարգից սթեյկը բացառել: Սակայն հիշեք, որ տապակած միսը, վերջին հետազոտությունների համաձայն, քաղցկեղածին է համարվում:

Խոզի միս

Չարժե սննդակարգից խոզի միսը լիովին բացառել: Խոզի սուկին կարող է սպիտակուցի որակյալ աղբյուր լինել` նույն առավելություններով, ինչ տավարի անյուղ միսը: Սակայն խոզի միսը չարաշահել, այնուամենայնիվ, չարժի. մեկ անգամ սնվելիս խորհուրդ է տրվում ուտել ափի կեսից ոչ մեծ մսի կտոր:

Հետևեք NEWS.am Medicine-ին Facebook-ում և Twitter-ում