Հուլիսի 3-ին «Էրեբունի» ԲԿ է ընդունվել 1975 թվականի ծնված Ա. Ա.-ն՝ աջ դաստակի ամբողջական հատմամբ (դաստակը մնացել էր պտտվող մեխանիզմի թիակների տակ): Մկաններին ամրանալու տեղից կտրվել էին բոլոր ջլերը, պոկվել էր դաստակի ճառագայթաձեւ հոդը եւ կտրվել էին բոլոր անոթներն ու նյարդերը, որոնք դաստակը սնուցում են:
Ընդունելու պահից հաշվարկը րոպեներով էր ընթանում, քանի որ հյուսվածքների վերականգնման հնարավորությունը, առավել եւս շոգ եղանակին, կտրուկ սահմանափակվում է:
Ինտենսիվ թերապիայի եւ վերականգնման բաժանմունքում հիվանդը ոչ երկար, սակայն շատ կարեւոր նախապատրաստական փուլից հետո անմիջապես վիրահատարան տեղափոխվեց: Միկրովիրաբույժների եւ օրթոպեդների երկու բրիգադներ՝ փորձառու անեստեզիոլոգների մասնակցությամբ, պլաստիկ վիրաբուժության եւ միկրովիրաբուժության ծառայության ղեկավար Արմեն Հովհաննիսյանի ղեկավարությամբ կտրված վերջույթի վերապատվաստման բարդագույն վիրահատություն կատարեցին, որը տեւեց մոտ 5 ժամ: Բարդությունն այն էր, որ անդամահատման դեպքում հյուսվածքները վնասվածքի մեծ խորություն ունեն, սակայն անհրաժեշտ է վերականգնել առողջ հյուսվածքների մակարդակում:
Վիրահատության վերջում հաջողվեց կտրված դաստակում արյան շրջանառությունը լիովին վերականգնել: Հիվանդը տեղափոխվել է պլաստիկ վիրաբուժության եւ միկրովիրաբուժության բաժանմունք, եւ ներկայումս վերականգնման կուրս է անցնում:
«Էրեբունի» ԲԿ-ի մասնագետները շատ են կատարել պոկված վերջույթների փոխպատվաստման վիրահատություններ, սակայն դրանցից յուրաքանչյուրը իր տեսակով յուրահատուկ է:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր