Կլինիկական սնուցման հիմունքները եւ արդի մոտեցումները» թեմայով դասընթաց՝ Երեւանում

Փետրվարի 24-ին Երեւանում («Իզմիրլյան» բժշկական կենտրոն) տեղի կունենա Անէսթեզիոլոգների եւ ինտենսիվ թերապեւտների հայկական միության կողմից կազմակերպվող «Կլինիկական սնուցման հիմունքները եւ արդի մոտեցումները» թեմայով դասընթաց:

Ինչպես տեղեկացնում է Միության կայքը, դասախոսելու համար հրավիրվել են տվյալ բնագավառում փորձառու մասնագետներ Ռուսաստանի Դաշնությունից: Դասընթացը նախատեսված է անէսթեզիոլոգ-ինտենսիվ թերապեւտների, ուռուցքաբանների, ընդհանուր վիրաբույժների, գաստրոէնտերոլոգների, այրվածքաբանների, կլինիկական դիետոլոգների եւ նուտրիցիոլոգների համար:

Դասընթացը կրեդիտավորված է ՀՀ ԱՆ Մասնագիտական գործունեության հավաստագրման ազգային կենտրոնի կողմից, այն մասնակիցներին, ովքեր ներկա կգտնվեն ամբողջ միջոցառմանը, կշնորհվի շարունակական մասնագիտական զարգացման 6 տեսական կրեդիտ:

Ինչպես տեղեկացնում է դասընթացի կազմակերպիչը, միջոցառման արդյունավետության գնահատման նպատակով նրանից առաջ եւ հետո կանցկացվի գիտելիքների անանուն առցանց գնահատում, ինչի համար Միությունը խնդրում է մասնակիցներին հնարավորության դեպքում ունենալ սմարթֆոն կամ պլանշետ ինտերնետ կապով:

Չնայած գիտելիքների գնահատումն անանուն է, սակայն ցանկության դեպքում մասնակիցը կարող է հայտնել իր անուն ազգանունը, քանի որ լավագույն արդյունքներ ցույց տված մասնակիցները կստանան պարգեւներ միջոցառման հովանավորների կողմից:

Հետևեք NEWS.am Medicine-ին Facebook-ում և Twitter-ում