«Հրե» պարուհին օդորակիչի պատճառով ուժեղ այրվածքներ է ստացել

Բրիտանուհի «հրե» պարուհի Սոֆի Լիի համար Չիկագոյում ելույթ ունենալու հրավերքը ծանր հետեւանքներով է ավարտվել: Աղջիկը պարով է զբաղվում 3 տարեկանից, իսկ վերջին 5 տարում կատարում է կրակի արատշնչում:

New York Post-ը հայտնում է, որ 23-ամյա Սոֆին fire show-ի տարրերով համար ուներ, սակայն հզոր օդորակիչի պատճառով կրակն անցել է նրա մարմնի վրա: Արդյունքում՝ Սոֆին ստացել է դեմքի եւ կրծքի ուժեղ այրվածքներ, նա ստիպված է եղել մեկ ամիս բուժում ստանալ ինտենսիվ թերապիայի բաժանմունքում:

Աղջիկը խոստովանում է, որ չէր կարողանում ո՛չ շնչել, ո՛չ ուտել, իսկ հայելու մեջ իր արտացոլանքը տեսնելով՝ պարզապես արտասվել է: Սակայն սրանով Սոֆիի դժբախտությունները չեն ավարտվել. նրա դեմքին եւ կզակին սկսել են աճել կելոիդային սպիներ (մաշկի կոշտ մանրաթելային շարակցական հյուսվածքի ուռուցքաձեւ աճ): Նման բան հանդիպում է վնասվածքներից հետո, հատկապես դարչնադեղնավուն կամ սեւ մաշկով մարդկանց շրջանում:

Սպիները Սոֆիին կուղեկցեն ամբողջ կյանքում, եւ նա կարող է դրանք միայն շտկել ստերոիդների ներարկման կամ լազերի միջոցով: Հիմա աղջիկը դատական վիճաբանության մեջ է չարաբաստիկ շոուի կազմակերպիչների հետ, որը նրա համար ճակատագրական էր դարձել:

Պարուհին նշում է, որ ողբերգական միջադեպն իրեն ստիպել է վերանայել իր ամբողջ կյանքը, եւ հիմա նա ջանում է այլ աղջիկների օգնել անկախ ամեն ինչից սիրել սեփական արտաքինը:

Հետևեք NEWS.am Medicine-ին Facebook-ում և Twitter-ում