Սովորական ատամմաքրիչը կարող էր 18-ամյա պրոֆեսիոնալ մարզիկի մահվան պատճառ դառնալ։
Ինչպես հաղորդում է The Daily Mail-ը, պատանին, ում անունը չի նշվում, երեք շաբաթ տառապել է ջերմությունից, սրտխառնոցից եւ արյան հետքերով լուծից, մինչեւ բժիշկներին հաջողվել է պարզել նրա վատ զգալու պատճառը։ Պարզվել է, որ տղան պատահաբար ատամմաքրիչ է կուլ տվել, որը մնացել է նրա աղիներում եւ վնասել զարկերակը։
Պատանին բոլորովին չի հիշել այդ առաջին հայացքից աննշան թվացող միջադեպի հանգամանքները։ Միաժամանակ, վիրահատական ճանապարհով ատամմաքրիչի հեռացման ընթացքում աղիների ծակվելու հետեւանքով նրա մոտ ուժեղ արնահոսություն է սկսվել, որը կարող էր մահվան պատճառ դառնալ։
Ընդհանուր առմամբ, երիտասարդին անհրաժեշտ է եղել երկու վիրահատություն եւ 10-օրյա բուժում հիվանդանոցում։ Բարեբախտաբար, նրա օրգանիզմն արագ վերականգնվել է, եւ հիվանդանոցից դուրս գրվելուց արդեն 6 շաբաթ անց նա վերադարձել է մարզումներին, իսկ եւս 7 ամիս անց մասնակցել է սպորտային մրցումների։
Նշվում է, որ ատամմաքրիչը կուլ տալու դեպքում ներքին հյուսվածքները վնասելու հնարավորությունը կազմում է 79 տոկոս, իսկ մահվան հնարավորությունը՝ 10 տոկոս։
Երիտասարդ մարզիկի պատմությունը ներկայացված է New England Journal of Medicine ամսագրում։
Source: The Daily Mail
Photos: New England Journal of Medicine
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր