Կեսարյան հատմամբ ծնված երեխաներն ասթմայի զարգացման մեծ ռիսկ ունեն. հետազոտություն

Կեսարյան հատմամբ ծնված երեխաներն ասթմայի զարգացման մեծ ռիսկ ունեն: Նման անսպասելի եզրակացության են եկել Ռատգերի համալսարանի հետազոտողները, որոնք առաջին անգամ նկարագրել են, թե ինչպես է կեսարյան հատումն ազդում երեխայի՝ մոր միկրոբիոմ օգտակար միկրոբներ ստանալու ունակությունը , եւ թե ինչպես է դա կարող հանգեցնել ասթմայի վաղ տարիքում:

Հեղինակների խոսքով՝ այդ հետազոտությունը, որը հրապարակվել է Science Translational Medicine ամսագրում, նշանակություն ունի երեխայի միկրոբիոմի ձեւավորումը հասկանալու համար:

«Մայրերի յուրաքանչյուր սերունդ փոխանցում է իր միկրոբիոմը հաջորդ սերնդին, քանի որ երեխան ծածկվում է օգտակար միկրոբներով: Սակայն դա տեղի չի ունենում կեսարյան հատմամբ ծնված երեխաների մոտ»,-ասել է հետազոտության համահեղինակ Մարտին Բլազերը:

«Ժամանակ է պահանջվում, որպեսզի այդ կերպ ծնված երեխաների մոտ նորմալ միկրոբիոմ զարգանա: Եվ այդ շրջանում նրանց մոտ մեծ է հետագայում ասթմայի զարգացման ռիսկը»,-ասել է նա:

Հետազոտության ընթացքում մասնագետները վերլուծել են՝ ինչպես է կեսարյան հատումն ազդում մոտ 700 երեխայի կյանքի առաջին տարում: Հետազոտողները հայտնաբերել են, որ կեսարյան հատումը կապված է ասթմայի եւ հետագայում ալերգիայի զարգացման կրկնակի ռիսկի, ինչպես նաեւ աղիների միկրոբիոտի կազմում զգալի փոփոխությունների հետ:

Սակայն մեկ տարեկանում ասթմայի ռիսկը նվազել է երեխաների մոտ, ովքեր ծնվել են կեսարյան հատմամբ, եթե նրանց աղիների միկրոբիոտը վերականգնվել է սկզբնական խախտումից հետո եւ սկսել է նորմալ զարգանալ:    

Հետևեք NEWS.am Medicine-ին Facebook-ում և Twitter-ում