Կանայք ավելի արագ եւ ավելի սուր են արձագանքում բացասական ազդակներին. BRT

Հյուսիսային Դակոտա նահանգի համալսարանի հոգեբաններն ուսումնասիրել են բացասական եւ դրական հուզական ազդակների ազդեցությունը տղամարդկանց եւ կանանց վիճակի վրա։ Հետազոտությունը հրապարակվել է Behavior Research and Therapy (BRT) գիտական ամսագրում։

Թիմը ցանկանում էր պարզել, թե ինչու են մարդիկ հաճախ ավելի ուժգին արձագանքում տարբեր սպառնալիքներին, քան թե պարգեւատրմանը։

Հետազոտողները երեք փորձերից բաղկացած շարք են իրականացրել, որոնց մասնակցել է 375 մարդ, որոնց նպատակն էր ուսումնասիրել, թե ինչպես են մարդիկ ընկալում դրական եւ բացասական (ավերսիվ) ազդակները։

Յուրաքանչյուր կամավորի տեղավորել են առանձին սենյակում՝ անհատական համակարգչով, որի էկրանին ցուցադրել են տարբեր պատկերներ։ Դրանց մի մասը հաճելի էր (երջանիկ մարդիկ, խաղացող երեխաներ), իսկ մյուսը բացասական զգացողություններ էր առաջացնում (ավտովթարներ, հոտած ուտելիք)։

Մասնակիցներն օգտագործել են ուղղահայաց ռեյթինգային գիծը, որն արտացոլվել է համակարգչի էկրանին՝ նշելու համար իրենց հուզական վիճակը։ Սանդղակի մի ծայրում գրված էր «Շատ տհաճ է», մյուսում՝ «Շատ հաճելի է», իսկ մեջտեղում՝ «Բազային զգացողություններ»։

Պարզվել է, որ մասնակիցներն ավելի արագ արձագանքել են ավերսիվ կադրերին, քան հաճելիներին։ Բացասական արձագանքների այդ արագ առաջացումը հաստատում է էվոլյուցիոն տեսությունն այն մասին, որ մարդիկ ծրագրավորված են պոտենցիալ սպառնալիքների հայտնաբերմանն ու դրանց արձագանքմանը, ինչը վճռական նշանակություն ունի ողջ մնալու համար։

Կարեւոր բացահայտում էր բացասական պատկերների ընկալման ուժի եւ արագության տարբերությունը տղամարդկանց եւ կանանց միջեւ։ Վերջիններն ավելի արագ եւ ուժեղ են արձագանքել տհաճ կոնտենտին։ Դա համապատասխանում է կանանց շրջանում վախի հետ կապված տագնապային խանգարումների եւ խանգարումների ավելի բարձր տարածվածությանը։

Հետևեք NEWS.am Medicine-ին Facebook-ում և Twitter-ում