Գիտնականները սովորել են քրտինքի վերլուծության միջոցով վերահսկել առողջությունը

Կորեայի Գիտության և տեխնոլոգիաների ինստիտուտի և Հյուսիսարևմտյան համալսարանի փորձագետները ներկայացրել են քրտինքի վերլուծության միջոցով առողջության մոնիտորինգի լուծում։ Նրանց խոսքով՝ սարքն ունակ է քրտինքի մեջ առկա տարբեր բիոմարկերների մասին տեղեկություններ հավաքել՝ առանց ֆիզիկական ակտիվության անհրաժեշտության՝ այն դարձնելով հատկապես սահմանափակ շարժունակություն ունեցող մարդկանց համար։

Հետազոտությունը, որը հրապարակվել է Biosensors and Bioelectronics-ում, ընդգծում է, թե ինչպես կարող է քրտինքը տեղեկատվության արժեքավոր աղբյուր լինել մարմնի ֆիզիոլոգիական վիճակի, սննդանյութերի մակարդակի և վտանգավոր նյութերի առկայության մասին: Մինչ այժմ այս տեղեկատվության հավաքագրումը կապված էր ինտենսիվ ֆիզիկական ակտիվության հետ, որն առաջացնում է քրտնարտադրություն, ինչը որոշ մարտահրավերներ էր ներկայացնում:

Նոր սարքը ճկուն և հեշտ օգտագործման համակարգ է, որը փոխազդում է մաշկի հետ, հաղորդում է Planet Today-ը։ Այն ներառում է հիդրոգել՝ քրտնագեղձերը խթանող դեղամիջոցով, էլեկտրոդներ, մարտկոց և միկրոհեղուկ ալիքներ՝ քրտինքը հավաքելու և վերլուծելու համար: Սա հնարավորություն է տալիս վերլուծել քրտինքի մեջ տարբեր նյութերի կոնցենտրացիան, ինչպիսիք են քլորիդները, ցինկը և երկաթը:

Առողջ կամավորների, ինչպես նաև կիստիկական ֆիբրոզով հիվանդների վրա անցկացված փորձերը ցույց են տվել, որ նոր սարքի միջոցով ստացված արդյունքները համապատասխանում են լաբորատոր անալիզի ավանդական մեթոդներին։ Սա նոր հեռանկարներ է բացում առողջության առավել հարմար և հուսալի մոնիտորինգի համար, հատկապես երեխաների և սահմանափակ շարժունակությամբ մարդկանց համար:

Հետևեք NEWS.am Medicine-ին Facebook-ում և Twitter-ում