Կոռնելի համալսարանի ամերիկացի գիտնականները հետազոտություն են անցկացրել, որը բացահայտել է մարդու կյանքի տևողության երկարացման ևս մեկ կարևոր գործոն։Պարզվել է, որ մոր երկարատև խնամքը երեխայի նկատմամբ նման խթանիչ ազդեցություն ունի։
Գիտական աշխատանքի հեղինակներն իրենց եզրակացության մասին պատմել են Proceedings of the National Academy of Science (PNAS) ամսագրում: Գիտնականներին նախկինում հետաքրքրել է, թե ինչն է օգնում մարդկանց սպասվածից երկար ապրել: Կոռնելի համալսարանի մասնագետների ուսումնասիրության արդյունքները ցույց են տվել, որ մայրական խնամքն այս գործընթացում կարևոր դեր է խաղում, գրում է PlanetToday-ը։ Հետաքրքիր է, որ այս գործոնը գործում է ոչ միայն մարդկային հասարակության, այլև տարբեր կենդանիների, առաջին հերթին կաթնասունների պոպուլյացիաներում: Դա ցույց են տվել պրիմատների տարբեր տեսակների խմբերի, ինչպես նաև բորենիների, կետերի և փղերի ընտանիքների բազմաթիվ դիտարկումները։
Հետազոտությունը հաստատել է նաև այն վարկածը, որ մոր և տատիկի առկայությունը և նրանց մասնակցությունը երեխաների ճակատագրում մեծացնում են նրանց գոյատևման հնարավորությունները։ Սա օգնում է հասկանալ, թե ինչու են կանայք դեռ երկար ապրում վերարտադրողական գործառույթի ավարտից հետո: Իսկապես, էվոլյուցիայի տեսանկյունից, եթե էգն այլևս չի կարողանում ձագեր ծնել, նա կարող է ավարտել կյանքի ցիկլը։
Բայց երեխաների և թոռների հանդեպ հոգատարությունն է, որ իմաստ է հաղորդում կանանց և էգ կաթնասունների տեսակների գոյությանը: Նրանք օգնում են հաջորդ սերնդին գոյատևել, և սա շատ կարևոր գործառույթ է ցանկացած համայնքում:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր